劉佩玥上星期32歲生日，已經先後食過多次蛋糕，慶祝活動持續至今。今次一班好姊妹為她舉行生日P，趙慧珊（Aka）、譚嘉儀、Miss Hunny、王子涵等齊齊穿上黑裙出席，大擺型格甫士sell美腿。
劉佩玥笑言其實覺得節日只要簡單過就可以，偏偏有位好朋友好重視，年年搞生日會，更愈搞愈大型。今年因為疫情關係，原本只打算吃餐飯就算，怎料成班朋友一齊癲，最終還是搞了個dress code派對：
「對於任何節日，包括生日，我覺得好簡單，應該一早就食完飯然後撻落床瞓覺慶祝。但我身邊就有位對於生日覺得好唔簡單嘅人，基本上佢由細到大嘅死黨們已經無佢咁好氣，但慘就慘在佢同我同一日生日，而我哋各自嘅朋友又變成咗對方嘅朋友，所以唔知邊一年開始，佢上咗癮咁攪生日派對由十幾人，到幾十人，再到七十幾人。每年我反眼反到世界盡頭，佢就興高采烈，樂此不疲今年因為疫情和工作關係，『尚氣』唔接下氣，明明話食餐飯就算，但仲有一班同佢一齊癲嘅女人。究竟，係唔係要諗一世dresscode…」
劉佩玥直認曾經嫌煩黑面，不過次次都「口裡說不，身體卻很誠實」：「雖然我經常為呢啲dresscode感到好無奈，一邊埋怨一邊黑晒面化妝，但每次睇返啲相，又好慶幸有呢啲回憶。好低能，好得意，又好好笑，每張相背後都係滿滿嘅笑聲。口裡說不…看見相片卻很誠實♥️ 多謝姊妹們呢一晚咁Over，好幸福，好感恩，好開心！」
