59歲的安德尊入行逾30年，至今仍然未婚，亦甚少有緋聞，不過昨日卻突然驚爆他早已秘撻42歲的宋芝齡，有指兩人被拍到撓手行街，頭貼頭傾密計，舉止親密。兩人由《都巿閒情》開始合作至現在的《流行都巿》，多年來經常在鏡頭前鬥氣，儼如歡喜冤家，鏡頭後亦關係親近。只是宋芝齡一直有拖拍，近兩年甩拖後，安德尊才展開追求。
對於與安德尊的關係，宋芝齡大笑回應：「我今日先知我拍拖哈哈哈！」她直認平時在電視城也會撓手，有時更會拖手，同事早已見慣。她笑指能夠取代李錦聯很開心，呼籲廣告商找她和安德尊一齊出job！可惜問到兩人的關係能否更進一步，宋芝齡就落閘指無可能，自己喜歡做生意，又透露目前沒有追求者。安德尊回覆傳媒查詢時直言：「嘥氣啦！嗰日外景完喺亞士厘道送宋小姐去搭港鐵，係咁多喇！」
