黃宗澤拍劇中暑要吸氧 需背大量法例「背到口臭！」

黃宗澤拍劇中暑要吸氧 需背大量法例「背到口臭！」

黃宗澤（Bosco）、王浩信、張達倫、孔德賢、胡㻗等昨日為邵氏新劇《廉政狙擊》拍攝外景，劇情講述廉政公署總調查主任的Bosco帶領下屬拘捕一名犯法的公職人員，當中有爆破、飛車等驚險場面。

Bosco身穿西裝在炎熱天氣下拍攝，笑言一個月前拍攝該劇初嘗中暑滋味，熱到出冷汗又手震，幸好當日拍動作戲有救護人員在場，於是走去即吸氧氣，他說：「拍呢部戲我動作戲不多，最辛苦係背讀法律條例、人名，法律條例是真的，所以唔可以記錯，連續拍了兩日ICAC戲份，講到我口都臭呀！最慘一人一段對白，全部人唔可以錯，背到我就嚟可以做律師！」

Bosco笑言今次與胡定欣、黃智雯及王浩信等一班好友齊齊演出，就連「萬歲」請客都要度期，亦承認自己經常請客，笑謂食到個個變肥，更提議戴祖儀做個貪食的ICAC職員，可以日日食零食。提到當年獲得最高收視的主演劇集《護花危情》將重播，令不少網民留言表示期待，亦有好多人為他當年未能奪得視帝而不值，雖然過往演出過很多受歡迎的劇集，但與視帝獎項均擦身而過，更認為TVB欠他一個視帝，對此Bosco坦言：「我覺得收視好、觀眾睇得開心、鍾意部戲就夠啦！視唔視帝真係無諗。（成為網民心目中的視帝？）咁就多謝啦！喺你哋心目中OK就得㗎啦！（奪得視帝獎會更開心？）將軍澳太遠啦！我去攞獎太遠嘥油呀！我記得套劇當時播映，好多觀眾都好鍾意，我覺得已經夠啦！好多人戥我唔抵，不能跟鍾嘉欣終成眷屬、睇到好肉緊，但已經好成功！」

戲中飾演警隊高級督察的王浩信，可見身形fit爆，他坦言今次角色做事好拼搏，捉賊會窮追猛打，所以有不少動作場面，更笑言該劇算是他最辛苦的頭三位的劇集：「今次係警察角色，相對體態幹練少少，都有操練身形，本身有75kg，之前拍《刑偵日記》時有80kg，呢部戲拍除衫戲當日係我十幾年來最輕磅數的一日，發現自己只有72kg，對我來講幾新嘗試，幾鍾意造型的輕巧狀態。」

飾演O記總警司的張達倫，表示在戲中跟一位小演員扮演父女，由於劇情講述女兒被捉走，當中有打鬥及追逐戲，他說：「之前拍追逐戲好好笑，連航拍機都追唔到我哋，着住西裝跑都幾『甘』！」

有份演出該劇的胡㻗，提到他在熱播中的劇集《我家無難事》的演技大受好評，就連張達倫也大讚他演技愈來愈好，胡㻗說：「一班好好前輩畀好多鼓勵我，鮑姐（鮑起靜）令我好易入戲，真係多謝她。」

飾演Bosco下屬的孔德賢，表示試過在炎熱天氣下拍攝，連西裝手袖位也出汗：「當時我畀Bosco睇下，佢即話『你都未拍過《飛虎》！』只是好簡單一句，畀我知道做年輕演員要捱得，不可以怕辛苦。」