鄧小巧去年大除夕宣布答應外籍男友「白先生」求婚，即將升呢做人妻！不過由於疫情影響，航班被取消，最快3月才有航班，故未能返港。
星期五她於社交平台留言，表示自己去年4月到加拿大探白先生時，二人都感染了新冠肺炎：「當時有唔少朋友話：唔好俾人知你中過啊。但其實，點解呢？點解要咁恐懼呢？知道多啲唔好咩？」
她透露自己先有病徵，喉嚨有少許痕癢時就做檢測，最終確診：「問我有冇背痛、發燒、咳嗽等各類症狀，然後叫我在家休息隔離10日。冇錯，喺加拿大如果你唔係重症，例如有呼吸困難、心臟問題等，佢哋都係叫你在家隔離，因爲差不多時間，白先生都有朋友感染，有啲人比較嚴重，但都係在家隔離。」
至於康復過程，她表示：「第一日嘅症狀係肌肉痛同全身無力,頭重重但冇發燒。第二日開始喉嚨痛，有鼻水，但肌肉痛同全身無力頭重重等已經開始變得好輕微。期間白先生投餵大量維他命C 、D 及zinc，同埋普通舒緩感冒徵狀嘅西藥。第三日冇喉嚨痛但有鼻水，開始冇咗少少嗅覺，但頗精神。」
「第四日完全失去嗅覺及部分味覺，有鼻水同痰及少少咳，精神唔錯。第五日 一樣。第六日 嗅覺開始返嚟。第七日 人好精神，少少咳少少痰然後味覺同嗅覺都返嚟啦﹗然後幾日繼續隔離，但身體冇大礙。中間醫療人員有打過幾次電話嚟，問下啲症狀等都係叫我好好休息。然後第11日就可以出外如常生活啦。」
小巧又寫道：「我唔係叫大家掉以輕心，叫大家當Covid係一個joke（某啲社交限制措施先係一個joke，唔使我補充），但亦都唔好當Covid係世界末日。我只係想同大家講：做足要做嘅措施，其他就交俾個天。足足兩年，總不能喺恐慌同擔憂中度過。
—
