日前ViuTV舉行《CHILL CLUB推介榜 年度推介21/22》，期間出現收音問題，許廷鏗演唱歌曲《修羅場》時，疑有工作人員忘記熄咪，令節目出街時傳出一把男人聲，不斷講「成件事係好正㗎！」、「睇整體㗎！睇整體㗎！」、「總之我同你講，成件事係perfect㗎」、「keep going keep going」。
事後許廷鏗坦言不開心，花了心思時間，希望為觀眾帶來最佳演出，無奈現實未如人意。他在社交平台的限時動態發文放負，言語間充滿失望：「睇返演出的直播，容許我真係有少少唔開心，唔係想怪責，但係花心機時間綵排演出，就係希望盡善盡美，可以令觀眾視覺聽覺有享受，喺台下一路做觀眾，我都真心覺得個show好正，所以更加想做好自己嗰part，好少咁樣放負，呢個story得24小時，俾我抒發一下，我仍然相信大家在努力，為着令觀眾知道表演是一門專業的學問，好啦﹗冇咩事我繼續努力準備出碟事宜。」
之後許廷鏗再發文，再度表達失落之情：「看到這樣的百花齊放，好多演出都令我雀躍，所以同自己講了一句：『一定要好好的去表演』，因為重視所以盡力，因為在意所以失落，因為不值所以抱憾，今晚讓我這樣一晚，明天還是會去盡力，為我的工作和唱片，為證明行業的專業，為回饋大家的支持，好少這樣表達失望，收到大家大力鼓勵，謝謝你們愛護包容，讓我任性放個負，#明天一切如常。」
距離上一放負帖文10小時後，許廷鏗終於釋懷，指因為事件而收到很多留言很多回應，換個角度想其實正是他唱歌的本意：「 也許遺憾也是另一種美，一覺醒來看了好多留言，差不多每一個都看到了。這標題是當中樂迷提到，我突然發現時間的神奇，原來時機到就可換角度，撇開自己的執念去看開，要求事事完滿的強迫症，意外換來更突顯的支持，咁樣其實都有可貴之處。講真主動dm都需要勇氣，何況隨時係素未謀面嘅，都會驚食檸檬或被漠視，所以你每一個like同emoji，其實我都覺得值得回應。就等於我唱歌綵排演出，每一個字每一粒音都係，希望傳遞到每一位樂迷，而說穿了我都同你一樣，我都希望得到回應共鳴，咁依家我收到好，多回應，換個角度其實得償所願，最緊要仲有下次有得唱。」
許廷鏗又指ViuTV的製作團隊已向他道歉，他亦感謝ViuTV迅速修復網上版本讓大家可以重溫。他更以工作人員不慎播出街的說話講笑自嘲「成件事整體係正㗎！」：「收到製作團隊致歉抱歉，其實我知道一點不容易，也知道大家付出的努力，失誤冇人想冇人會好受，錯有錯著反而可以知道，原來好多人著緊愛樂壇，呢樣就已經係最好的事。還是要多謝 viutv的應對，網上重溫版本已經修復，聽大家講話係very perfect，我都相信依家個頒獎禮，「成件事整體係正㗎！」 #嗱本身話俾我唔開心24個鐘 #依家12個鐘就開心返喇仲識搞笑 #好啦大家安心重溫」
