張敬軒日前為手機品牌首次執導拍片，更一人分飾MIRROR 12子！他在社交平台分享拍攝海報的製作花絮彩蛋短片，笑言「男團一啲都唔易做 #我的男團夢已幻滅」
他表示，拍攝前需要揣摩12人的神韻：「每一位都有唔同形象，點樣先可以展現到自己嘅獨特性，真係一件唔簡單嘅事。淨係擺pose，真心扭到我條腰又痛，腳仔都淵埋，冇番咁上下跳舞底子真係搞唔掂；仲有，本公要收起我平時嗰啲嘅滄桑又帶啲憂鬱嘅眼神，要用佢哋嘅嗰種自信又堅定嘅眼神望住鏡頭，真係好大挑戰。」
他表示，入行至今見證三、四代藝人，有成功有失敗。他認為最重要是努力，如果不努力，即使有幸運之神眷顧也不可能獲得成績：「呢十二位年輕人四年前都喺呢個城市嘅四面八方、各行各業入面行出嚟，為自己嘅夢想同信念去參加比賽，因為憑着自己嘅努力同觀眾嘅支持，喺過程當中一步一步進步，跌低又爬番起身，氣餒又重新振作，最後成軍進入樂壇，成為今天本地最成功、人氣最高嘅男子組合。」
他說：「佢哋嘅成功亦都有賴每一位相信佢哋嘅人嘅支持同幫助，不過呢個世界冇free lunch, 我相信每個行內人都可以想像過去呢幾年佢哋嘅瘋狂期表。佢哋有而家嘅成績，除咗觀眾嘅支持，仲有佢哋自己嘅汗水同付出，無論體力同意志力上都係極大嘅挑戰，而為嘅就係唔令到支持佢哋嘅觀眾、佢哋嘅屋企人、身邊同佢地共同進退嘅團隊嘅信任同支持白費。」
在 Instagram 查看這則帖子
