「白色強人II」醫生出戰「流行都市」 獎門人YT帶隊鬥大王

「白色強人II」醫生出戰「流行都市」 獎門人YT帶隊鬥大王「白色強人II隊」嘅 郭晉安、 陳豪 、 馬國明 、 胡定欣 、 唐詩詠 同 張曦雯，喺聽晚播出嘅《開心無敵獎門人》會出戰「流行都市隊」嘅 安德尊、 張美妮 、 彭慧中 、 蔡嘉欣 、 吳天佑 同 譚永浩。呢集一開場已經熱鬧非常喇，造型一致嘅「流行都市隊」齊齊倒模大王嘅招牌西裝加黑框眼鏡造型，相當有隊形；而「白色強人 II 隊」就齊齊以醫生袍上陣，又一邊嗌口號一邊做動作，不過陳豪似乎就完全喺狀況外，完美甩晒Beat，比有「天然呆」稱號嘅馬國明更加天然呆呀。喺「開心無敵落大閘」環節，平時聲大大嘅大王就成為「攻擊」目標，無論係緋聞對象宋芝齡、定係「仇人」李錦聯都被擺上枱；而張美妮亦玩得相當落力，七情上面同譚永浩上演壁咚。「白色強人 II 隊」嘅「院長」安仔就因未能秒答太太歐倩怡嘅經典兒歌歌名，被指返屋企要頂痰罐。而「辣辣壽司」環節當中，情緒異常亢奮嘅大王又因為口多多爭住講嘢，激到獎門人扮嬲：「你估依家係《流行都市》呀？」最後大王就被整蠱要食多舊辣辣壽司喇。輪到「開心無敵茶餐廳」環節，「白色強人II」隊中嘅三大視帝同兩大視后以精湛演技表現，定欣示範極速入戲跪喺地上「認屍」，情感爆發嘅詩詠就秒速流淚，陳豪就親身扮演死屍，演出相當精彩。而喺「開心無敵彈遮遮」環節，安仔仲誤上「賊船」同大王組隊答問題，結果就頻頻接受「淋水」洗禮，最終仲頂唔順「跳船」等大王自己嚟呀。#开心无敌奖门人#白色强人2