李幸倪計劃年尾開騷 不停學跳舞玩唱跳歌手李幸倪（Gin Lee）昨晚（11日）為籌款節目《博愛歡樂傳萬家》擔任壓軸嘉賓，她身穿露背的毛毛上衣上陣，她稱將首度現場表演新歌《Dum Dum》：「我帶住興奮又緊張嘅心情，希望一切順利，我尋日綵排呢首歌初時有少少甩漏，但後來都好好。（有冇做定熱身？）有呀！我一早起身就做熱身，又拉筋又練舞同敷面膜。」問到下首作品會否改為唱慢歌？她笑言：「我成日同同事講笑，唔好隨便做跳唱歌手，因為真係好攰，同事話我都叫你企定定唱歌就算，我頭先跳咗一陣都出晒汗，下一首先唱番慢歌，隔一隔再跳唱 」她坦言計劃今年尾或明年初開騷，故有意多推出幾首跳唱歌以配合個唱：「就算下首係慢歌，我都會不停學跳舞，為將來嘅個唱做準備，我安排每星期上2、3日跳舞堂，一直學到開騷，我發現跳舞真係唔容易，跳唱一首歌已經好花體力，要跳晒成個騷就更難。（會唔會向師姐容祖兒請教？）會，下次見到佢一定要請教，不過公司嘅歌手都好忙，我喺公司春茗見過佢一次，之後就未見過，希望將來有機會同佢合作。」Gin Lee似乎有心挑戰做跳唱歌手。今次露背索爆。仲話今年尾或明年初開騷。等你好消息。李幸倪
李幸倪計劃年尾開騷 不停學跳舞玩唱跳
