隱形戰隊｜詩詠婚紗現身甜美可人 阮浩棕演鏗少被爆背景澄清傳聞以執行神秘任務為主題嘅劇集《隱形戰隊》播出只係短短一星期，不過已經引發唔少熱話，除咗節奏緊湊、個案贏盡好評之外，女主角 劉穎鏇 身穿彩虹比堅尼戰衣大晒蜜桃臀、 劉佩玥 以誘惑Tone掹玻璃引發遐想之後，今個星期就到靜極思動嘅 唐詩詠 Natalie tong 出招， TVB官方社交平台發布兩條宣傳片，身穿婚紗嘅詩詠唔止皮膚白滑、身材姣好，加上甜美笑容同情深眼神就更為殺食喇。雖然詩詠同馬明今次已非首次飾演情侶檔，不過觀眾然受落，對佢哋喺預告中情深一吻，仲大嗌襯到絕，仲有人話希望《白色強人 2》中憾未能修成正果嘅佢哋，喺《隱形》中有情人終成眷屬。但係就有觀眾同時擔心咁甜美嘅情節背後暗藏「殺」機，仲擔心主角會有人遭遇不幸。而另一預告片同樣以詩詠飾演嘅Madam Q為主，主題仲係「情敵見面份外眼紅」，劇中 Ocean( 馬國明 飾)一直非常搶手，除咗同前任Madam Q糾纏不清， 現任Shadow( 劉佩玥 飾)為宣示主權，就以露肩超短裙婀娜多姿現身，大晒長腿之餘仲直接向Madam Q挑機，而詩詠嘅怒火眼神亦非常有戲，令觀眾紛紛競猜馬明情歸何處，更大讚阿Moon又甜又索。而個案嘅角色同樣吸引觀眾，今晚將會結案嘅「野外活人狩獵」Case，飾演Big Boss鏗少嘅 阮浩棕 將再有「爆炸性」演出，被Shadow多番挑釁嘅佢仲由超冷靜演變至發狂失控，成功演繹出相關心理狀態轉變嘅層次。自鏗少露出躁狂真面目後，觀眾已對佢有唔少讚賞，就連出名要求高嘅監製 文偉鴻 亦公開呼籲大家留意阮浩棕嘅演出。 出身演藝世家嘅佢，其實係香港首位電視女主播 梁舜燕 嘅孫， 學業成績不俗嘅佢，畢業於喇沙書院同香港科技大學，修讀「音樂與戲劇」嘅佢最後決定由銀行界轉向演藝界發展，2014年透過藝 訓班加入無綫。阮浩棕曾離港赴北京發展，2020年重返無綫，之後憑《愛‧回家之開心速遞》嘅「米剛」，同《我家無難事》飾演關禮傑年青版而為人關注。今次飾演「鏗少」再獲好評，阮浩棕亦喺IG 報喜。佢受訪時就話最大發揮係是角色嘅「純粹邪惡」：「我份人比較靜，情緒唔會好似鏗少咁激動，加上開機之前監製有好詳細咁講解角色嘅背景我聽，幫助我明白同理解，所以就可以好自然 進入鏗少嘅瘋癲狀態喇。」為確保角色手上紋身連戲，佢每次上落妝都花好大工程：「有時外景收工，手上面紋身會落得唔乾淨，我特登買咗防曬手袖戴，避免嚇親人。」對鏗少一角備受關注，阮浩棕坦言開心之餘，亦要澄清兩大誤傳呀：「網上有資料顯示我哥哥係演員，仲話佢做過《奬門人》嘅奬老， 其實我哥哥係圈外人。另外仲有資料話我識法文、韓文、泰文、印尼文等等，其實我只係識兩文三語，好多謝大家咁關注我同我屋企人，我以後會繼續努力。」阮浩棕最後仲驚爆鏗少今晚個案完結後，之後仲會再「回歸」：「鏗少嘅故事並唔係咁簡單，後面仲會有更瘋狂嘅行為，大家一定要密切留意《隱形戰隊》。」隐形战队
隱形戰隊｜詩詠婚紗現身甜美可人 阮浩棕演鏗少被爆背景澄清傳聞
