陳展鵬發力「箍煲」 林夏薇落閘： 最初係普通朋友由陳展鵬與林夏薇主演的《逆天奇案》4年前播出時獲得收視，台前幕後今午（16日）雲集電視城，宣布續集正式開鏡。上集交代二人情海翻波，今集更有方力申（小方）「介入」，展鵬自然要更加發力「箍煲」，不過薇薇受訪即「落閘」說：「小方係新朋友，同展鵬開始只係普通朋友。」展鵬指今次查案及動作戲較多，故事更見懸疑，故追看性十足，薇薇即說：「佢喺廠得閒就會練腿，因為有啲重頭打戲，而我就負責睇番上集溫故知新。」問到何會與「情敵」小方「肉搏」，展鵬說：「唔會，佢仲協助我哋查案，打牙骹就有。」薇薇又透露自己與小方有「出埠戲」，但實際只會站在布幕前拍攝，後期用LED畫面去製造特別效果，感覺特別。至於馬國明會否客串演出，展鵬指不清楚實質安排，二人齊大賣關子。另外，久違了的梁小冰突然現身，劇內她將夥拍丈夫陳嘉輝，客串演出其中一個單元。小冰坦言已26年未有幫無綫拍劇：「今次我飾演一個潦倒落魄又滄桑嘅黑幫中人，依家呢個造型最靚嘞，大家影多少少相，之後戲份我非常醜樣，觀眾要有心理準備！（係咪一直有戲癮？）如果唔撩我就冇乜嘢嘅，我咪日日煮飯囉，但今次劇本Send到嚟，劇情又非常感人，所以啲戲癮就咁出番晒嚟。要歸功於編審，佢講古仔講得好好，聽佢講完之後，我就答應咗。」嘉輝角色暗戀小冰30年，他說：「難得可以同老婆一路拍拖一路拍戲，回味吓當年，一齊食開工飯盒都唔錯。」談到照顧兒子，小冰指對方已經16歲，可以「獨留在家」：「佢都唔係好要我陪嘞，成日叫我去同爹哋拍拖。」至於《愛‧回家之開心速遞》似曾「鋪路」讓她加入，她說：「我驚表錯情呀，要人哋真係邀請我嘛，送上門食檸檬唔係幾好。我覺得佢（陳嘉輝）喺戲入面嗰3個仔，真係超級靚仔，我都好恨，但都要問監製係咪想用我先。」早前於另一劇集內扮演敗家仔的小方，今次「改邪歸正」演生物學教授，且出力協助展鵬及薇薇破案，最終發展成「三角關係」，小方強調戲內與薇薇只是好朋友，為對方做心理輔導，幫她放下以前不開心的事，不存在「爭女」問題。而其造型與日劇《神探伽利略》內的「湯川教授」福山雅治異曲同工，問到何擔心被指抄襲，他大方回應：「我係演員啫，冇所謂啦，乜都會畀人講。」小方打趣指自己游泳學校的拍擋，知道他再接劇，即問「唔係又演敗家仔呀？」，深怕影響學校形象，最終得悉細節，自然放下心頭大石。而今日與前緋聞女友馮盈盈同場，問到會否趁機約食飯？小方與盈盈即透露僅得一場對手戲，盈盈在上季被封為「國民妖精」，她稱第2季將會「洗白」，與高鈞賢是好甜蜜的情侶。前者更再次澄清當年只是一張合照，卻惹來美麗的誤會：「即係煲水唔會滾，同埋依家點會有秘密？之前冇相都搵到我真命女友啦。（同盈盈合作，有同女友備案？）唔需要嘅。今次我嘅對白冗長，好多仲要係英文嘅專業名詞，我都要做好多額外嘅功夫，例如上網查正確嘅發音。」而高鈞賢被問到早前拍家居片，令豪宅曝光，之後卻被網民踢爆豪宅位處內地而不是香港，懷疑他講大話，高鈞賢大方承認並解解：「背景係我廣州嘅屋企，其實我當時喺度拍緊廣告，而嗰個廣告商係想針對香港客，發生咗呢個錯誤，我都有同佢哋講番。（搞到誤會你喎。）冇所謂。（你好多樓喺手？）香港嘅單位係買嘅，廣州同北京都係租，依家唔係買樓嘅適當時候，況且可能我出年又唔係廣州。廣州嘅單位叫價2,300萬人民幣，我只係租1萬5千蚊，租比較化算啲。」
陳展鵬發力「箍煲」 林夏薇落閘： 最初係普通朋友
