【晴報】新劇《隱門》都有份丨譚偉權約滿TVB第二度離巢發展 感激伯樂王心慰：請繼續支持我「Gary哥哥」譚偉權今日（25日）在IG分享自己離開TVB的消息，他分享自己正式向無綫交還職員證、儲物櫃鎖匙等等，再次告別公司。54歲的譚偉權畢業於香港演藝學院，獲獎無數，1991年加入TVB由兒童節目主持做起，曾獻唱多首兒歌，其中以《白石嶺公園》的「十二隻恐龍去野餐…」最深入民心，陪伴不少港人成長。譚偉權1997年曾經離開TVB重返舞台劇界發展，亦在戲劇教育方面出心出力；直至2013年，Gary選擇重返TVB，主力拍攝劇集，十年來已參演超過30多部劇集，大部分以客串或者單元故事為主，其中他在《失憶24小時》內飾演綁架案綁匪「炎星」最深入民心。Gary今年十年期合約正式約滿離巢，至今還有兩部劇集未播出，分別是下周啟播的《隱門》及不日播出的《異空感應》。而回復自由身的他為HOY TV拍攝資訊節目《東呃西騙》，與歐陽偉豪、七仙羽等人合作。Gary在社交平台撰長文表達離巢的感受，「係呀，我約滿離開咗公司喇！希望大家繼續支持我啦！想搵我做舞台劇、音樂劇、拍攝劇集、任何類型節目、商演、廣告、電影、主持、任何類型表演，歡迎隨時聯絡本人傾談合作機會。我係（喺）較早前返回公司交還公司四寶，因為如果唔交還就要交錢。咁我梗係交還呢啲身外物啦又用唔到嘅，錢就可以用得到呀嘛，梗係留喺自己個袋度啦！另外又可以睇吓我突然返公司會撞到邊啲有緣人。」原來Gary是刻意走到「伯樂」監製王心慰的房間，親自答應兼道別。Gary續言：「我都未開口想答謝感恩你一直對我嘅照顧，你就劈頭同我講：『你做乜做咗個咁大嘅決定都唔同我商量吓呀？』跟住你就話你都明白我而家做緊一啲我喜歡做嘅嘢，跟住你就喺櫃桶攞咗一封紅封包俾我，祝我事事順利、大展鴻圖、工作順利！我當時係忍住眼淚收你嘅利是，我唔係唔想搵你傾，只不過因為知道你套劇埋緊尾好忙，所以唔敢騷擾你。我真係好多謝你一直以來由我返回公司拍第一套劇《梟雄》，到最近拍攝我離開公司前最後一套劇《異空感應》，你一直都畀機會我，你每次開新劇都會預一個有發揮空間嘅角色畀我，萬分感激！你仲話你由以前睇我做音樂劇，到之後見到我去咗有線電視做《拉近文化》嘅主持，你心就有啲戚戚然話點解咁㗎？跟住我返回來公司時你就一直畀機會我，多謝你感激你Amy姐。同你傾完偈分享咗我呢大半年做嘅嘢，你都替我好開心，叫我繼續努力加油，將來開新劇有啱嘅角色會再搵我回來拍攝。遲啲有時間仲會嚟睇我嘅音樂劇，多謝你呀！」另外，Gary不忘答謝公司所有監製、導演及所有台前幕後的同事關照。#谭伟权#
【晴報】新劇《隱門》都有份丨譚偉權約滿TVB第二度離巢發展 感激伯樂王心慰：請繼續支持我
