一舞傾城│陳法蓉憑喊戲獲推舉視后勁開心 自爆角色帶挈豬籠入水：仲有愛喺裡面陳法蓉、唐文龍、楊明和姚子羚等今晚出席觀賞《一舞傾城》結局飯聚，提到日前「青龍」唐文龍為保護「沙律」陳法蓉中槍而死，陳法蓉的一場喊戲令人動容，她回應道：「我睇到都跟住喊呀，好痛苦，好慘呀！收到好多朋友短訊，佢哋都話一齊喊，又問青龍係咪假死，佢哋覺得我哋喺劇入面有幾幸福就有幾難過。」對於角色得到好評，陳法蓉表示已經「賺晒」，「去到邊都有人我叫沙律媽，真係好開心，好有滿足感，雖然早兩日又撞傷腳趾，但開心令到我唔驚痛。」她又指角色帶挈她接多了工作，包括真人騷、內地直播及廣告，「唔好話豬籠入水，但辛苦咁耐，大家咁鍾意個角色，賺到唔止係錢，仲有愛喺裡面。」她更特別多謝製片人王晶和曾志偉，「我最初推咗套劇，多謝志偉哥堅持叫晶哥搵番我做呢個角色。不少人都認為此劇是陳法蓉奪視后之作？她聞言表示：「我又唔係親生女，幾時輪到我？？不過見好多人喺網上留言畀我，話我有機會提名視后，咁多人祝福我，已經當贏咗，同埋如果有得提名，我一定會飛返嚟。（有信心？）之前同閨蜜玩遊戲『我有你無』，朱茵話佢係影后，蔡少芬係視后，我都希望有個肯定。」李婉華日前批評此劇教壞細路，問王晶是否仍很嬲？陳法蓉表示：「每個人都有自己諗法，有人鍾意，有人唔鍾意，環球小姐都有人話唔靚，其實無啱同錯，鍾意嘅就繼續鍾意，唔鍾意嘅可以唔睇。」楊明和姚子羚對於劇集眨眼間便大結局感到相當不捨，楊明表示：「劇集好少講八、九十年代，但係呢套劇令大家懷緬嗰個年代市面嘅氣氛，而且好多歌曲都配合到嘅畫面，好有年代氣息，聽返好多以前嘅歌，原來都有成80首嘅，覺得呢個編排都好有心思，連我媽咪都話都有感覺。」覺得收視可以去到幾高？楊明笑言：「我set咗去到100點，其實拍嘅時候大家都冇預期收視會去到幾多，只希望出盡全力做好件事，冇諗到成果，但係依家收視同口碑都好好，大家都好開心同滿意。」子羚透露稍後會放假叉電，問楊明會否計劃放假？他笑言之前已經放了一個長假期，現時會努力工作，亦會專注拍攝《愛•回家之開心速遞》。陈法蓉
一舞傾城│陳法蓉憑喊戲獲推舉視后勁開心 自爆角色帶挈豬籠入水：仲有愛喺裡面
