【封面故事】結婚15年 丁子高做埋經理人 楊千嬅：佢係有啲活力俾我！ 回帶到一九九五年，楊千嬅參加《新秀》入行，今年便是她入行三十周年，問她會怎樣慶祝？她說︰「我唔會用慶祝去形容，我覺得係一個感謝祭，三十周年，我發現自己要甚麼生活和人生，因為我唔需要再做啲乜來證明自己，有發生過嘅，時間已經幫我證明晒，反而我好清楚了解自己，歸於自己真實感受和生活，我好想去遊歷四方睇下世界，趁有力氣嘅時候，想去陪個仔去睇個世界，但我仍然好喜愛音樂，作品紀錄我生命，突然間呢幾年好多感受，創作力好澎湃，已經做緊新唱片，新唱片就唔講住，但想透露少少，我會做一個Recollection，一些對我人生十分重要的歌曲，我會重錄一次。」提到世巡的香港站，千嬅就十分感慨，「雖然我仲未可以返去香港做，繼續等待啦，入紙紅館，我諗真係有八、九次，但我要先停一停休息下先，身體的而且確有少少毛病，都係啲舊毛病，我需要去處理一下。」現在千嬅對香港歌迷，仍有一份執著？她卻不同意，「我唔覺得係執著，係一份愛，都唔需要講太多，送一隻歌俾我所有三十年香港嘅歌迷、曾經嘅歌迷，合作夥伴、好朋友，總之所有認識嘅緣份，首歌叫做《我等我在》，大家會明白㗎喇！」不少香港歌迷到最終場，他們用iPad打出這首歌，由開場到散場都大嗌「我等我在」，相信千嬅在最後一場會送上驚喜。學習一種叫「鈍感力」唱了三十年，開過無數大大小小演唱會，這次《MY TREE OF LIVE世界巡迴演唱會》，千嬅坦言真正enjoy the stage，「在台上，我好放鬆好舒服，呢個就係年輪啩，依家好唔一樣，『忘記智商去做人都願意』（《小星星》歌詞），我都係一個聰明樣啦，到我五十歲，我可以話俾你知，『忘記智商去做人都願意』，唔係你冇智商冇智慧扮睇唔到扮蠢，而係你有更加大智慧，去包容所有缺陷，依家學習一種叫『鈍感力』，用心去touch別人、用心去feel，每件事唔好即刻有太大反應或者負面情緒，你會更加識得欣賞人，當你識咁做嘅時候，原來過得很快樂，冇咁執著，同自己有一個更加愉快相處。」千嬅續說︰「以前一月一日（叱咤）之後，我即刻錄歌，因為我輸咗，我甚至乎要求我所有同我一齊做嘢嘅partner，都要proud of同楊千嬅合作，我已經開始追求嗰樣嘢，要push自己去一個高度上面，當時覺得呢樣先叫做into一件事，或者成功，多年之後，我先領悟到，呢個唔係錯，但原來唔係我真正需要去做嘅嘢！雖然我唔知道曾經同我一齊做嘢嘅人，會唔會因為同楊千嬅合作過感到自豪，我唔係好sure，但我好sure我proud of我擁有嘅嘢，proud of我今日嘅團隊、proud of我自己，因為呢啲係我尊嚴，你唔鍾意我、批評我，OK嘅，文明社會正常係可以咁做，我係公眾人物，而我做嘅嘢你唔鍾意，唔代表人哋錯，但你否定我同時，唔代表可以否定埋我尊嚴，音樂係我尊嚴。」老公兼經理人丁子高和楊媽媽每站都隨行，跟父母環遊世界一直是千嬅的心願，這次她也跟家人遊歷一些地方，而老公丁子高擔任經理人至今已第七年，「夫妻共事」是怎樣一回事？千嬅說：「首先，我覺得姊弟戀幾好啦，我仍然覺得佢係有啲活力俾我，跟住佢又貪靚啦，所以佢會迫我扮靚，原來一個人一世嘅對手，就係伴侶！我結完婚嗰日，我同佢講，其實我好好彩呀，佢問點解？我話我細個，根本冇諗過做人老婆，因為我性格又太偏激，我話其實真係多謝你，唔該晒！婚姻我領悟到一樣嘢，原來大家要有客觀存在，兩公婆工作都會爭拗，但係，大家出發點都一定係為對方好，雙方都有盲點，咪講個盲點出嚟囉，原來婚姻考慮結唔結婚，唔係你最激情熱烈嘅時候，係激情熱烈完，喂，我哋相處到喎，咁樣就穩陣好多、舒服好多！婚姻係用嚟相處，唔係談戀愛，當然我哋可以保留愛情呢樣嘢，有嘅，但層次唔一樣，嘩，我依家可以講到婚姻喇，唔再淨係講啲藝人嘢，你同我講父母都得㗎，總之呢幾年，我做咗好多好開心嘅事！」杨千嬅丁子高
【封面故事】結婚15年 丁子高做埋經理人 楊千嬅：佢係有啲活力俾我！
