《新聞女王2》有近廿萬人預約觀看 與《刑偵12》聯動細節劇迷激讚

《新聞女王2》有近廿萬人預約觀看 與《刑偵12》聯動細節劇迷激讚TVB 77工作室早前舉行春茗暨慶功宴，席上宣布將會陸續同觀眾見面嘅新劇，當中包括《刑偵12》、《巨塔之后》、《夫妻的博弈》、《正義女神》、《模仿人生》及《新聞女王2》，消息宣布後，幾套劇都成為內地睇劇網站嘅熱搜關鍵詞，當中下月先正式開拍嘅《新聞女王2》更成劇迷期待之最，暫時已經有19.4萬人預約想睇佘詩曼飾演嘅Man姐惡鬥SNK電視台。而由宣萱、陳展鵬、鍾鎮濤、陳煒、劉佩玥、馬國明、蕭正楠、吳若希等主演嘅醫療權鬥劇《巨塔之后》，亦有12.4萬人預約收看。至於日前剛剛釋出片花、由佘詩曼、陳煒、周嘉洛主演嘅《正義女神》，則有6.5萬人預約收睇，高海寧、馬國明、張頴康等演出嘅《夫妻的博弈》亦有4.3萬人預約收睇。雖然林保怡回歸之作《刑偵12》未有喺網站內設有官方專頁，但亦有劇迷將其預告片擺上網，片中驚現《刑偵12》同《新聞女王》嘅夢幻聯動。《刑偵12》以新七宗罪為主題，劇中患有解離症嘅張振朗，為捉到兇手不惜代手兇手世界，而喺預告片內就有一幕張振朗於電視台節目《西張東望》中「新七宗罪殺手解謎」環節被捕嘅一幕，當中嘅電視台就係《新聞女王》入面嘅SNK台，唔少劇迷見到都讚呢個細節相當驚喜。