楊茜堯因反叛入TVB 大爆楊明曾坐爆訓練班玻璃枱藝人楊茜堯近日受訪時大談入行趣事及經歷，她稱入行前TVB對她來說是一個很遙遠的地方，她解釋：「因為我細個，我爸爸好鍾意睇亞視，唔畀我哋睇無綫，我有個好反叛嘅行為，你唔畀我睇，我要入去演戲，有一日你就要焗住睇我演嘅劇，有一日真係有朋友搵我一齊參加無綫嘅訓練班，所以就入咗去。」提到訓練班難忘事，楊茜堯想起楊明，她稱一直當對方是細佬：「課室有張玻璃枱，佢成日坐上去，終於有一日佢坐爆張玻璃枱，我哋成班同學夾計，將啲玻璃碎由班房偷運出去丟咗佢，而唔畀老師知道，最後好成功，訓練班完咗，下一期新人再嚟，都冇人發現冇咗塊玻璃，我記得當年係每人袋少少走咗出去。好美好回憶，放飯時候冇乜錢，超巿好多試食，我哋唔食飯，就去試食食飽，成班十幾人去食，唔夠就叫姐姐加多啲畀我哋食，又會組團去旅行，好開心。」楊茜堯自爆當年係因為爸爸唔畀睇TVB，所以先反叛加入TVB。喺訓練班好多美好回憶。最難忘當年「細佬」楊明坐爆玻璃枱。全班夾手夾腳運玻璃碎去丟掉。談到拍了這麼多部劇，哪部劇最大突破，楊茜堯首選2006年的劇集《賭場風雲》，因該劇對她整個人影響深遠：「拍呢套劇之前嘅我係一個比較內向嘅人，我從來唔會着裙同背心去影相，如果你要我着我唔影，嗰時我嘅性格係咁，跳唔出個框框，我有少少倔強，我唔鍾意就唔做，所以《賭場風雲》令我放低咁倔強嘅性格，因為個角色要參加選美，同埋係一個隆胸女仔，所以不停要喺鏡頭前展示自己美態，同埋要跳出自己好守舊嘅框框，鏡頭成日拍我個胸，同埋要好短嘅褲同裙，完全打破真實嘅我，所以拍完套劇之後，我放得好開，乜都會試吓，係一個好大影響同轉變，冇呢套劇未必有今日嘅我，嗰套劇令我開竅。」至於合作演員中對她最大影響的她，她提到汪明荃，兩人曾在劇集《婚前昏後》中飾演母女：「佢係一個好準時同敬業嘅演員，但只要你做好自己，佢就會欣賞你，我一直都表現得好好，但有一日我唔舒服，心不在焉，集中唔到精神演戲，第二日佢同我講『你尋日做咩嘢，我見到你演得好差，你平時唔係咁，你唔好呀，你唔好驕傲，你要畀心機，演員一驕傲好容易走下坡』佢講完呢番說話之後，我就諗，就算演員病都好，但觀眾唔會知你病，作為一個演員，你幾攰、幾唔想講嘢都好，都唔可以喺鏡頭前表現出嚟，我同自己講，我一定要撐，一係唔做，一做就要做好。」佢感激汪明荃當年點醒自己，堅守保持演員嘅專業。杨茜尧
楊茜堯因反叛入TVB 大爆楊明曾坐爆訓練班玻璃枱
