李佳芯宣傳冇影　譚俊彥氹歸隊

李佳芯宣傳冇影　譚俊彥氹歸隊女神李佳芯（Ali）離巢無綫後，近日夥拍黎諾懿於馬來西亞拍攝新劇《義和》，前晚更於當地舉行粉絲見面會。剛巧其離巢作《麻雀樂團》推出，Ali分身不暇未能返港協助宣傳，昨日首次宣傳活動交由男主角譚俊彥「領軍」，監製羅永賢則承諾Ali的戲份將「有多冇少」。李佳芯除了拍劇，亦有不少工作接洽中。無綫劇集《麻雀樂團》記者會上，譚俊彥帶領郭柏妍、姜大衛及韋家雄等亮相，獨缺Ali自然美中不足。活動上眾人齊齊穿上禮服現身，郭柏妍與黃洛妍更分別以大提琴和小提琴與樂團於現場演奏。譚俊彥受訪時大方回應：「知道套劇上，大家都開咗個通訊群組，反應好熱烈，同Ali講佢都好開心。」他又指稍後劇迷將看到Ali與一眾拍檔合體於線上宣傳，又指自己今天將到馬來西亞及新加坡工作，時間許可的話會去探Ali班。戲份有多冇少問到可會游說Ali回港參與宣傳？他笑說：「日日都游說緊，佢真係忙緊，佢返嚟梗係會出席啦，我哋呢家人感情好難分開，因為拍攝期間正值流感高峰期，大家病咗都唔請假繼續拍，呢份感情好難被取代。」監製羅永賢同樣表示：「一直同Ali保持聯絡，佢依家返唔到嚟，但都有出Po喺線上宣傳。盡量爭取啦，希望佢返到嚟宣傳，甚至慶功就最好。（冇咗佢失色？）當然！但呢啲情況好多時會發生，唔好話Ali自由身，就算喺公司都可能有其他工作安排。（冇減佢啲戲？）有多冇少，Ali係我哋女主角，佢嘅戲咁緊要，我哋點會自斷一臂？」郭柏妍被問到Ali缺席時謂：「佢拍劇嘛，但係唔緊要，鐵鐵（Ali）係與我哋常在嘅。」至於Ali早前於馬來西亞病倒，原來是劇組交叉感染，眾人先後受下呼吸道病毒來襲，幸而目前她已康復兼且精神爽利，日前更孖住拍檔黎諾懿拍視頻放笑彈。前晚Ali、黎諾懿及劉芷希率先獲健康品牌之邀出席粉絲見面會，席間被問到有否興趣於當地接拍賀歲片時，黎諾懿提議「魔音」Ali負責獻唱主題曲，Ali聞言即反寸「港普代表」黎諾懿說：「咁你一齊唱國語版喎。」引得滿堂大笑，炒熱全場氣氛。另外，黎諾懿日前晒出獲周家蔚及錢嘉樂夫婦探班的合照，卻獨欠洪天明蹤影，他解釋：「成日都有人嚟探班，佢哋今次係嚟做『獎門人』騷，家蔚隨天明同行，不過天明跟住有嘢做返咗香港嘞。嗰日我哋只係匆匆一見，佢哋離我拍攝場地8分鐘車程，咪過去一陣打招呼囉。」《義和》預計將於9月初煞科，目前正趕拍Ali的主景戲份。據悉，馬來西亞商機處處，對Ali與黎諾懿這對CP更大感興趣，目前已有其他工作正在接洽中，稍後將有好消息公布。劉芷希（左起）、黎諾懿及李佳芯在馬來西亞出席粉絲見面會。黎諾懿及李佳芯甚有默契。黎諾懿獲周家蔚及錢嘉樂夫婦探班。身為男主角的譚俊彥領軍谷劇。郭柏妍即場演奏大提琴。劇集記者會上播放李佳芯的演出片段。譚俊彥與李佳芯合作火花十足。