【封面故事】黎姿都有追新劇 佘詩曼望《金枝慾孽》大重聚劇集《新聞女王》本周大結局，收視獲得好成績，劇集首周平均收視26.9點，是2021年至今黃金時段收視冠軍，最高收視達27.9點，近180萬觀眾收看，為港劇爭口氣，「Man姐」佘詩曼功不可沒。相隔六年重返無綫拍劇，兩屆視后的阿佘，被網民睇好再下一城，可能會成為首位三屆視后；阿佘直言已過好勝階段，「最開心出街個個叫我Man姐。」阿佘透露，監製鍾澍佳多年前已構思開拍《新聞女王》，但劇本一直未成形，阿佘說：「有一日鍾澍佳send message信息給我，話有套劇度咗十幾廿年，而家有劇本喇，有一個角色好啱我，叫我睇下，我睇完八集，問他仲有冇呀？當時我已經知道接拍的機會好大，一路睇劇本已經好有畫面，我向來睇得愈慢的劇本，就表示愈鍾意，演員係靠feel去演戲，我feel到個角色，touch到我，拍出來的效果一定唔差。」佘詩曼強勢回巢拍攝《新聞女王》，網民推算大有機會成為首個三屆視后。曾經港劇是亞洲先鋒，近年的確被其他地方劇集趕上，阿佘今次接拍亦帶着一份使命感，「可以吸引到大家趕返屋企追劇已經好開心，我本身唔算好量產，追我演嘅劇就緊係更加開心啦，亦同時希望以大局為重，希望香港電視圈可以回去以前的蓬勃光景，個個放工返屋企追劇，我有時會趁電視播緊，戴頂帽就入去茶餐廳，聽下大家反應，聽下大家討論劇情，自己偷偷地笑囉，見到呢個景象係好開心。」阿佘先後憑《鳳凰四重奏》、《使徒行者》奪得視后寶座，網民推算她大有機會成為首位三屆視后。1997年入行的阿佘，1999年開始拍劇，至今已拍攝40多套劇集，六年前離開無綫，阿佘沒有說過「娘家」半句不好，阿佘的確飲水思源，「再同TVB合作就好似返咗屋企，台前幕後大部分都認識，令我想起好多以前的點滴，好溫暖，以前拍劇好密集式，一年拍4、5套，現在已經唔需要開通宵喇！監製都想演員狀態好嘅。」無綫的視帝視后曾經競爭非常激烈，2004年的《金枝慾孽》，劇中四位女主角當年亦難分高低。新劇連黎姿都有追！外衝之後，阿佘接拍的劇都大爆，如《延禧攻略》、《鬢邊不是海棠紅》等，老實講，現在的阿佘大把劇本在手，有什麼吸引她回巢拍劇？「首先當然是好劇本，好好玩的角色，唔止我自己，劇入面每個角色都好突出鮮明，每個人都有個story，其實咁樣演員先會投入和俾心機去演。」阿佘說「Man姐」的角色很現實，新聞部就如社會的縮影，「呢個世界好多『Man姐』，只不過佢唔知叫乜姐，出街好多人見到我都話，套劇好似講緊我公司咁呀！每間公司都可能有個『Man姐』、『曉薇』或者『Cathy』，我覺得係社會縮影。」咁同無綫的山頭文化似唔似？機靈的阿佘說：「我真係唔知高層係點，我又唔係高層。」相隔六年再次走入TVB廠，令阿佘想起當年日夜顛倒拍劇的情景。新劇連《金枝慾孽》老拍擋黎姿都有追看，阿佘和黎姿至今仍保持聯絡，「佢真係好忙，又要湊小朋友、又要做生意，但佢都有時間睇，我哋上個月都有食飯見面。」轉眼《金枝慾孽》已差不多是20年前，但至今仍是宮鬥劇的始祖和經典，有冇機會再次原班人馬再創經典？阿佘說：「我都想大重聚，緊係想啦！真係經典，我記得拍劇每日都好好玩，劇中每個人都表裡不一，我望住你講乜，其實裏面都又是另一回事，永遠都要估大家想點？觀眾睇得過癮。」問阿佘會否再想接拍宮鬥劇？她說：「我唔抗拒宮鬥劇，但劇本要好過《金枝》、好過《延禧攻略》，我諗真係要花很多時間去雕琢個劇本。」阿佘回巢拍劇，除了劇本好，也希望盡一份力令港劇再次蓬勃起來。老套都要問句，視后點睇？「由我收劇本到開始拍呢套劇，都唔係衝住個獎而返嚟，當然，因為而家套劇播緊，又就快到頒獎禮，大家一定會咁問，隨緣囉！即係有咪有囉，咁冇就冇囉！最開心出街個個叫我Man姐，咁已經贏咗。」阿佘是《萬千星輝頒獎典禮》最多得獎記錄保持者，先後獲得11個獎項，同時亦是兩屆視后，與鄧萃雯平手，網民推算阿佘大有機會成為首位三屆視后，阿佘說，心態不同了，「好勝，我曾經都有，當你未得到過，當然想要啦！而當其時我的確置身其中，好似參加奧運，個個都衝住個金牌㗎啦，但我而家已經唔係參賽者喇，我只是經過，冇可否認，當你得到過，的確沒有第一次想得到的渴望，完全唔要？咁都要有體育精神嘛，(再攞就有三個金牌？)係先算啦！」化妝：Katherine Lo髮型：Lorraine Lam @Hair Culture服裝：Fendi造型：Christina Hsu場地：Regent Hong Kong 香港麗晶酒店佘诗曼
【封面故事】黎姿都有追新劇 佘詩曼望《金枝慾孽》大重聚
