【封面故事】混入茶記聽「Man姐」民意 佘詩曼結婚首要條件劇集《新聞女王》本周大結局，收視獲得好成績，劇集首周平均收視26.9點，是2021年至今黃金時段收視冠軍，最高收視達27.9點，近180萬觀眾收看，為港劇爭口氣，「Man姐」佘詩曼功不可沒。相隔六年重返無綫拍劇，兩屆視后的阿佘，被網民睇好再下一城，可能會成為首位三屆視后；阿佘直言已過好勝階段，「最開心出街個個叫我Man姐。」阿佘和「Man姐」都是外表硬淨，感情仍然交白卷，阿佘坦言這幾年都有拍過拖，但未成氣候不想公開，母親近十年八年亦已沒有再催婚，「七魔女」的姊妹團都已為人母，現在阿佘最享受做契媽，「計計埋埋有十幾個契仔契女！」1997年入行的阿佘，1999年開始拍劇，至今已拍攝40多套劇集，六年前離開無綫，阿佘沒有說過「娘家」半句不好，阿佘的確飲水思源，「再同TVB合作就好似返咗屋企，台前幕後大部分都認識，令我想起好多以前的點滴，好溫暖，以前拍劇好密集式，一年拍4、5套，現在已經唔需要開通宵喇！監製都想演員狀態好嘅。」佘詩曼強勢回巢拍攝《新聞女王》，網民推算大有機會成為首個三屆視后。外衝之後，阿佘接拍的劇都大爆，如《延禧攻略》、《鬢邊不是海棠紅》等，老實講，現在的阿佘大把劇本在手，有什麼吸引她回巢拍劇？「首先當然是好劇本，好好玩的角色，唔止我自己，劇入面每個角色都好突出鮮明，每個人都有個story，其實咁樣演員先會投入和俾心機去演。」阿佘說「Man姐」的角色很現實，新聞部就如社會的縮影，「呢個世界好多『Man姐』，只不過佢唔知叫乜姐，出街好多人見到我都話，套劇好似講緊我公司咁呀！每間公司都可能有個『Man姐』、『曉薇』或者『Cathy』，我覺得係社會縮影。」咁同無綫的山頭文化似唔似？機靈的阿佘說：「我真係唔知高層係點，我又唔係高層。」無綫的視帝視后曾經競爭非常激烈，2004年的《金枝慾孽》，劇中四位女主角當年亦難分高低。曾經港劇是亞洲先鋒，近年的確被其他地方劇集趕上，阿佘今次接拍亦帶着一份使命感，「可以吸引到大家趕返屋企追劇已經好開心，我本身唔算好量產，追我演嘅劇就緊係更加開心啦，亦同時希望以大局為重，希望香港電視圈可以回去以前的蓬勃光景，個個放工返屋企追劇，我有時會趁電視播緊，戴頂帽就入去茶餐廳，聽下大家反應，聽下大家討論劇情，自己偷偷地笑囉，見到呢個景象係好開心。」《延禧攻略》阿佘破天荒演出奸角，比起女主角吳謹言更加亮眼，也成為阿佘其中一套代表作。阿佘近年演的角色都很強勢，除了「Man姐」，《延禧攻略》的嫻妃也令人看得咬牙切齒，不過阿佘對此大平反，「我唔知自己的外表係咪好硬淨，其實我都係普通女仔，我都有煩惱，我都會唔開心、有軟弱，都會迷茫，都有懷疑自己的時候，普通人身上的情緒我都會有，出到嚟做嘢，仲下下都小鳥伊人咩？我都過咗嗰個階段啦，有時乜都要頂住，遇到咩困難，都要諗辦法解決，都咁大個人啦。」阿佘回巢拍劇，除了劇本好，也希望盡一份力令港劇再次蓬勃起來。事業得意，感情還未有著落，阿佘笑言母親近年已沒有再催婚，「早十年八年她都會問我，『你到底會唔會結婚嘅呢？都唔細喇喎。』我每次都只會答『做咩啫？咁都要我鍾意先得㗎！』我唔會為結婚而結婚，首要條件，我真係要鍾意先得，起碼我要睇到同對方係有將來，一齊行到落去嘅人，唔會人有我有的心態。」阿佘坦言這幾年都拍拖，只是最終未有開花結果，「有拍㗎！只係大家唔知，未成氣候就無謂講啦，『佘詩曼』其實已經好透明，我想留返少少私隱俾自己，而家？冇拖拍，到真係結婚都冇得唔同大家講啦。」母親和「七魔女」可有做媒人介紹？「佢哋知我唔鍾意咁刻意，相睇？冇呀！嚇鬼死人咩！走去相睇！」阿佘先後憑《鳳凰四重奏》、《使徒行者》奪得視后寶座，網民推算她大有機會成為首位三屆視后。提到「七魔女」，其他六位湯盈盈、梁靖琪、文頌嫻、姚樂怡、鍾麗淇及周家蔚都已為人母，阿佘亦不愁寂寞，享受做契媽多過做阿媽，「佢哋真係好可愛，計計埋埋有十幾個契仔契女！有個契女就快去外國讀大學喇，最細就2歲，Toby個仔。」阿佘對於小朋友有一套相處模式，「小朋友係最單純，你俾幾多，他們就接收幾多，冇得假，你假佢哋都feel到㗎，真係鍚佢會知，下次見到都會黐住你，我記得有一次幾個姊妹去旅行，文女(文頌嫻)個女嗰陣三歲左右，下晝喺酒店學嘢，之後我、文女同佢老公一齊去接放學，嘩！Jamie一出嚟走埋嚟攬住我隻腳呀！我直情覺得好似贏咗世界冠軍，淨係攬住我喎，感覺好正。」未問阿佘有沒有母性大發，她已經搶答：「早啲都ok，而家唔好喇。」阿佘直言母親曾經也對她的人生大事很緊張，但近幾年已放棄催婚。「七魔女」至今仍經常聚會，但其餘六位都已成家立室，姊妹聚會變成家庭聚會。最細的契仔是Toby兩歲兒子化妝：Katherine Lo髮型：Lorraine Lam @Hair Culture服裝：Fendi造型：Christina Hsu場地：Regent Hong Kong 香港麗晶酒店
【封面故事】混入茶記聽「Man姐」民意 佘詩曼結婚首要條件
