黎明詩今晨睡夢中離世 終年58歲淡出幕前多年、90年代玉女歌手黎明詩今早（28日）於睡夢中離世，終年58歲。據知她勇敢抗癌大半年，不少圈中朋友已收到消息，她今早於睡夢中離開。其生前好友梁思浩回覆東網，指自己已知道對方離世消息：「對不起，我跟她太多經歷 太多難忘嘅事情 如果我要講，我一定喊到工作唔到！因為我真係好心痛，請大家見諒」他續指：「我其實比你哋更加早就知道，因為我唔喺香港…呢一年裏面其實佢已經好叻好叻，希望大家唔好打擾佢嘅家人，畀啲空間佢嘅家人同埋Kelly（黎明詩同性密友）。喺呢段時間裏面，佢已經好叻去面對，我哋亦好多人去陪佢面對呢件事。我唔識再講啦，因為呢兩日我拍緊廣告，我一路拍，一路同佢家人有聯絡。佢好叻，對朋友非常好，好有義氣，我哋身邊嘅朋友好唔捨得…希望大家掛住佢嘅笑容同埋歌聲！」黎明詩勇敢抗癌大半年，今晨於夢中離世。1991年由演員轉形成歌手，新碟獲金唱片成績。形象健康，獲封「玉女歌手」。於1990年與黎明詩曾合唱過《異性相吸》的張立基表示：「好突然，啱啱過去農曆新年佢仲有喺我哋《流行經典50年》個群組send訊息出嚟，我完全唔知佢有病，對上一次見佢係疫情之前，期間只係喺群組傾偈。黎明詩喺我心目中印象係一個好活潑、爽朗嘅人，希望佢安息！」黎明詩父親為香港粵劇演員黎家寶。她於1986年暑假期間，在香港獲星探相中，先後拍攝屈臣氏汽水、可樂、巧克力及護髮素等廣告，未幾再獲邀參演首齣電影《代客泊車》。1987年，她參加無綫電視新秀歌唱大賽，1988年參加亞洲電視亞洲太平洋歌唱大賽，及後正式加入娛樂圈，參演數部電影，包括《霸王花》及《獄中龍》。及至1991年推出首張個人專輯《Besame》，獲金唱片成績。同年更獲得多個新人獎，亦因形象健康，獲封「玉女歌手」。1998年，她下嫁銀行高層Eric Fung後淡出娛圈，惟2017年跟老公分居及離婚，同時出櫃認戀同性密友。黎明詩被大讚對朋友非常好，好有義氣。永遠懷念其笑容及歌聲。R.I.P.#黎明诗#
黎明詩今晨睡夢中離世 終年58歲
