專訪｜蕭正楠當年「邪不能勝正」連父母都被追訪：呢樣令我最難過一句說話足以影響一個人的命運，尤其是在娛樂圈，@蕭正楠Edwin 02年出道，當時是超級新人，連星爺、梅組都點名看好，亦在年尾頒獎典禮做大贏家，前途一片光明，但就在一個樂壇頒奬禮上，他說了一句話，令整個前途逆轉。當時就是這句「邪不能勝正」被媒體斷章取義，將蕭正楠塑造成一個囂張，不可一世的藝人，那時是紙媒盛行，娛樂雜誌愛用搶眼標題作報導的年代，加上沒有互聯網，蕭正楠可說是有冤無路訴，於是他由新人王變成傳媒針對對象，令他前途一落千丈，被傳媒批評他承受得起，唯獨一事他耿耿於懷，他說：「連我父母都被追訪，問佢哋『點解你個仔咁差？』呢樣係我最難過。」蕭正楠承認當時曾經有怨恨過，但到現在他有另一番見解，他說：「人要經歷挫折，因為發生咗呢件事，令我好珍惜而家遇到嘅每一個機會。」蕭正楠當年被一句話令星途出現大轉變，但現在他反而覺得有這個挫折令他更加成熟。蕭正楠表示那句話是在一個頒獎禮慶功宴上說的，但當時他並不是指向任何一個人，他說：「我講緊呢句說話，係講緊文章的一個標題，當時就有記者聽到，即刻擰過嚟，『你講乜呀？』我仲繼續同佢講，咁佢就攞咗我呢句做標題。」那句標題 「邪不能勝正」是當時《壹周刊》找蕭正楠的經理人李進專訪，之後成為專訪的標題，蕭正楠沒想到順手沾來一用，竟然引發大新聞。蕭正楠當時已知錯，他明白不能在公眾場合，過份衷心直口，但他知錯已太遲，那時的傳媒是瘋狂的年代，蕭正楠新人王變成囂張王有新聞爆點，於是，他每次出席公開活動，記者們都「有備而來」訪問他，想看他有多囂張，甚至追訪他的父母，令蕭正楠開始怕面對傳媒，甚至拍面對人，他低著頭過每一天。除了「邪不能勝正」，蕭正楠最令人記得應該是雪雪凍。蕭正楠那時只得26歲，原本是新人王，但一下子變成負面新聞藝人，這個天堂與地獄的落差令他難以承受，他說：「你諗下我新人嗰年，就算你去到紅隧都見到你大大幅嘅海報，話你係新人王，全年最矚目嘅男歌手，之後去到邊都畀人鬧，要阿爸阿媽代答你個仔有幾差，呢個落差太大喇，（天堂同地獄？）對我嚟講真係天堂同地獄嘅分別，但你能唔能夠喺地獄行返上嚟，就睇你自己。」蕭正楠北上發展期間亦拍過內地劇更擔演第一男主角那時蕭正楠在香港受到很大壓力，唱片公司叫他上北京避一避，順便北上發展，於是蕭正楠拿著兩萬人民幣，加一個旅行喼離開香港北上，一上就三年，每年過農曆新年才回港，他說：「真係人生路不熟，（你當時國語水平？）仲差過黎諾㦤，由零開始慢慢去適應⋯⋯每年大約返嚟一、兩星期，因為返得耐又開始見其他人，之後啲新聞又出嚟，跟住我都係同阿媽講返去喇，至少返到去北京，冇人用奇怪目光望你，知你係香港嚟內地發展嘅歌手。」蕭正楠當年以歌手身份出道，在頒獎禮上掃獎。雖然蕭正楠在北京飄泊了三年，但其實亦有不少機會，拍內地劇是第一男主角，不過蕭正楠因媽媽一向話決定離開北京，回香港發展甚至轉行亦可以，重提這事蕭正楠亦眼濕濕，他說：「因為媽咪年紀好大，我去北京之前爸爸亦走咗，所以剩返佢一個，佢當時同我講『唔好再驚喇，返嚟啦，就算唔再做呢行都無所謂啦，正正經經搵過另一份工，你唔駛再畀錢我，我夠駛嘅，咁當然我哋唔係富裕家庭啦，佢話點都好啦，唔好咁樣生活落去喇』」就是媽媽這一段話，蕭正楠回歸香港，剛好有人可介紹入TVB，於是他開始在電視界發展。蕭正楠剛加入TVB 就是經理人合約，令他的收入有一定的水平，可以專心工作，他非常感激公司，機會由男配，慢慢開始由男二到最後擔任男一，算是穩步上揚，而他的工作心態，亦和初出道時大不同，他拍《翻生武林》時，因為那年劇接劇，身體亦開始支持不住，有一天生蛇了，他說：「開頭以為整損咗咋，但後尾愈來愈痛，之後有場浸浴戲，一起身，啲人望到我背脊『阿蕭你生蛇喇』，（咁你抖咗幾耐？）我抖咗一晚囉，因為我哋啲廠期好密，你遲一日，人哋開工就遲一日，（係咪因為你以前經歷，所以而家好珍惜)可能係，原來機會唔係一定畀你㗎，以前唔駛諗，每日排好哂，幾點邊到唱歌、幾點邊度做訪問，你出現就得㗎喇，你冇時間諗其他嘢，因為你身處其中，但原來你發現，機會可以幾年都唔出現」蕭正楠拍攝《翻生武林》期間一度生蛇。「我已經好好，可以慢慢喺呢到行返上嚟，但其實仲有好多人仲係努力緊，仲等緊一個機會，所以係咪要好好珍惜呢？有時我會諗如果冇發生呢件事會點呢？其實人係需要經歷挫折，你先知努力得返嚟嗰種喜悅，（有冇畀個同行冷嘲熱諷？）當然有啦，聽到聽唔少，『做乜搵啲二打六歌星代言呀？出哂事喇』你諗下我的唱片公司同事幾慘？就算我返嚟都有人繼續對我唔好，有人唔俾機會我，但我當呢啲係逆菩薩，咩叫逆菩薩，就係有啲人會難你，但結果係會令你好嘅，只要你能夠克服佢，你就會成為一個更好嘅自己，我係咁諗架，（你而家仲驚唔驚負評？）我而家百毒不侵喇。」蕭正楠拍攝《師奶Madam》開始認識黃翠如。蕭正楠在TVB除了找到事業，亦找到他的太太黃翠如，原來他初時見到黃翠如沒有太大感覺，他對太太的第一印象，是對方拍攝吸濕大笨象廣告，他說：「佢企喺陸浩明隔離，只係做咗三個表情，我覺得呢個女仔幾cute喎，都之後拍《師奶Madam》，我都係覺得佢係一個幾好嘅拍檔，因為套劇有好多笑位，我成日度啲攪笑嘢，但佢冇包袱喎，反而同我一齊玩，我又幾欣賞。」後來黄翠如到外地採訪世界杯，蕭正楠因為喜愛足球，二人開始多了聯絡，久而久之就日久生情。蕭正楠 ，黃翠如2018年結婚2018年蕭正楠與黃翠如結婚，婚後經常見到蕭正楠為太太煮飯，當大家以為他們放閃，但實情是他要照顧黃翠如，他說：「唔係放閃呀，佢係唔識照顧自己架，即係你掛塊餅喺佢條頸度，佢剩係食前面見到嗰啲，後面嗰啲唔理架，所以你要照顧佢，我好記得，疫情期間我入隔離營，我一知道咋，我即刻同佢亡命飛車去買嘢食，買完返去煮熟佢，放喺雪櫃，之後我安心上車去隔離。」蕭正楠更指黃翠如是超級慳妹，貴為一綫花旦，原來黃翠如考到車牌後，用的是爸爸去地盤的舊車，他說：「佢架車係撞到四隻角花哂架，之後架車出煙喇，佢知道唔得喇，先換第二架車。」不過蕭正楠相當欣賞太太這種美德。萧正楠黄翠如
專訪｜蕭正楠當年「邪不能勝正」連父母都被追訪：呢樣令我最難過
