【TVB.COM】伍允龍枯木逢春終結單身 認愛細13歲李蔓瑩甜蜜睇林峯騷現年47歲嘅 伍允龍 去年憑電影《九龍城寨之圍城》人氣急升，事業彈起，不過愛情遲遲未見起色，令城寨兄弟們都講笑話要幫佢公開招親。當時Philip亦多次分享擇偶條件，又話一直都有識女仔，希望可以遇到真命天女，而5月28號就終於傳出好消息，公開新女友身份喇。日前Philip被網民捕獲同妙齡女子共遊主題樂園，Philip上星期出席《城寨》電影展覽揭幕禮時，亦被追問同女朋友仔一齊去玩係咪終於出Pool。不過Philip就用自己中文差做藉口「耍太極」避答，只係話同一位朋友去玩。但係直到27號，Philip再次被拍到同呢位靚女甜蜜現身林峯演唱會，仲有傳媒火速挖出對方真正身份，原來佢係現年34歲、曾自認係雙性戀嘅宅男女神 李蔓瑩 。報道一出Philip亦火速認愛，佢向傳媒發聲明話：「各位傳媒朋友大家好，好多謝大家最近嘅關心，噚晚同我一齊出席演唱會嘅，係我女朋友Renee，亦都係較早前一齊去主題樂園玩嘅朋友，最近透過朋友介紹認識開始拍拖，希望嚟緊大家都俾多啲時間同空間我哋，多謝大家！」雖然Renee同Philip相差13歲，不過兩人外貌登對又有共同興趣，同樣鍾意打機。加上Philip舊愛 鍾嘉欣 亦多次讚前度性格好，係鑽石王老五。相信佢地嘅感情都可以一直甜蜜落去，加上Philip難得高調認愛，似乎將女友睇得非常重要，一啲都唔想佢做自己「背後女人」。可惜Philip同嘉欣呢對無緣情侶「前後腳」出現喺紅館，一個26號做阿峯嘉賓，一個27號拖新歡睇騷，如果唔係Philip都可以介紹下新女友俾舊愛認識下喇。伍允龙
【TVB.COM】伍允龍枯木逢春終結單身 認愛細13歲李蔓瑩甜蜜睇林峯騷
