凶宅清潔師│洪永城默認本月11日婚期？ 激讚未婚妻是餘生好伴侶
洪永城 (Tony) 首次擔任監製的TVB新劇《凶宅清潔師》昨日進行通宵拍攝工作，《香港01》獨家探班。現場除了Tony，還有主演的鄭俊弘以及傅嘉莉，該劇屬驚慄喜劇，C君與盧思麟亦有份監製。問到因何會做監製，Tony表示：「個故事係同盧思麟一齊創作，原來日本真係有兇宅清潔師呢個職業，咁我哋構思完同公司提出，經過約一年時間籌備，兩個月前終於開拍。C君負責睇劇本，佢係編審，由我哋三個人一齊去做。(將來仲會唔會繼續做監製？) 嚟緊就唔知，監製嘅工作量畀我想像中多好多，會唔會再做幕後都係睇公司決定，睇下有無機會。」
Tony近日忙拍劇之外，亦要忙於籌備婚事，提到他的未婚妻梁諾妍 (Inez) 指他對婚禮要求好高，比她更像新娘，對此Tony直認不諱：「佢係偏向chill啲relax啲，我追求細節，要得體順暢，嘉賓、流程、嘢食安排等等都想做到最好。」對於有報道指兩人已落實於本月11日在尖沙咀K11 Musea旁的瑰麗酒店擺酒，問到婚期是否屬實，Tony說：「唔透露住，總之大家好快就會知道，我都會通知傳媒朋友。」並沒有否認婚期，又承認不會派喜帖，而是發e-invitation。問到他最愛Inez什麼，他說：「佢嘅優點好難一個鐘講得晒喎，佢性格好好，好單純善良，非常適合共度餘生，你個好好嘅partner。我哋拍咗拖兩年幾，我好早已經認定佢，覺得佢係好好嘅老婆。(100分滿分畀幾多分？) 一定要畀110分啦。」
鄭俊弘駁髮「冬菇」頭挑戰Heavy角色 劇組遇靈異事件
現場除了Tony，還有主演的鄭俊弘 (Fred) 以及傅嘉莉。Fred在劇中飾演的洪仔造型相當破格，有別於他以往所演的靚仔角色，他的「趣緻」冬菇頭更是駁髮打造。談到該角色，Fred說：「洪仔係無乜自信，不修邊幅，對手有好多傷痕係自己抓自然，佢會跌入一個黑空間同一隻惡魔有connection，係畀佢吸咗入去。之後佢同好朋友招仔 (洪永城飾) 做咗兇宅清潔師，要克服好多嘢，一齊去捉鬼打鬼。」
Fred表示演今次的角色有難度：「個角色係好heavy，乜都驚，天黑前要返屋企，因為佢細個時同招仔遇過靈異事件，令到佢自此好細膽，有時又會驚到喊，做看更巡樓又會好驚，好多情緒，又要成日對空氣做戲。」至於在真實世界中可曾遇過靈異經歷，Fred說：「試過畀鬼責，但唔係太驚，相信只係自己攰。我feel唔到呢啲嘢，不過聽劇組講佢哋喺西環拍間屋拍嘢時，好多同事都feel到有嘢，好似有嘢喺佢哋隔離咁。」
