朱智賢星期日於社交平台，公開多張雙腳被咬到一撻撻的照片，自爆過去一個月被家中木蝨問題困擾，最後更要「離家出走」，請滅蟲公司上門滅蝨！
她表示︰「在家裡懷疑發現木蝨嘅蹤影，木蝨呢兩個字聽就聽得多，原來當佢出現喺你屋企嘅時候，係真係好可怕﹗整整一個月時間受到困擾，咬咗嘅皮膚會又痕又痛起水泡，而被咬嘅次數係每日增加。去到最後兩個星期完全瞓唔到，每日係會痕到醒！就算食咗會令人昏迷嘅抗組織胺藥都無用，一樣係會痕醒！由於已經嚴重影響到我日常生活，夜晚瞓唔到覺，日頭會因為長期睡眠不足而唔可以正常function到個人，亦都無胃口食嘢，所以最後離開屋企搵滅蟲公司解決。」
雖然滅蟲公司進行了兩次滅蝨，朱智賢仍然心有餘悸︰「今次呢個經歷又再remind我，做人最緊要身體健康，無病無痛，如果唔係真係唔會開心。喺呢度亦都希望大家身體健康，希望我今晚可以好好瞓一覺。」
