【晴報】郭晉安憶為18點低收視離開TVB 「好似將我嘅演藝生涯劃上句號」三屆視帝郭晉安的演技早已獲得大眾的肯定，剛剛播完的《白色強人II》，他亦有望封第四次視帝寶座。1985年，填詞人盧國沾看上了安仔，而簽約無綫，第一套劇集是《城市故事》，之後在《誓不低頭》中，飾演謝文武的兒子謝平安，隨即受無綫力捧，站穩一線小生之列，而代表作有《創世紀》、《戇夫成龍》、《忠奸人》等等。不過，在安仔的星途中也曾遇過逆境，當年因一套有份主演的劇集，收視竟低開錄得18點，成績強差人意，他以為自己的事業就此完結。在1990年代， 無綫的收視總是「長勝將軍」，但安仔卻有低收視「黑歷史」。他早前接受港台節目《好心情經理人》李志剛訪問時表示，「平均收視叫做合格呢，起碼都要有28點，但當時我嘅劇集播出第一個禮拜，結果係18點！喺嗰個年代基本上係冇可能…係冇可能面對一個咁大嘅挫敗，我聽到收視成績，碌咗落床，好似將我嘅演藝生涯劃上句號！全公司啲人都覺得係一齣好好嘅劇，我真係面對唔到…我過唔到呢關。」根據資料顯示，安仔所講的劇集有可能就是1994年播出的時裝劇《生死訟》，內容講述冤獄及司法不公，由於情節太過喊苦喊忽而不受觀眾歡迎。想不通，看不透，還不到30歲的安仔，決定暫別無綫，「我知我條路好長，做藝人可以做到80歲，如果我唔早啲搞清楚，將來都會重複番呢啲問題。我真係好大決心，走就走。我同公司講，份合約保留住，直至有一日我返嚟為止，公司都冇我符，搵過好多人勸我都冇辦法，我話要搞清楚方向先，要搞清楚邊啲題材嘅劇集先適合我。」離開無綫的3、4年間，安仔在內地、新加坡、馬來西亞、台灣工作，很多合作對手都跟他分享自己的演藝經驗。直至1999年《創世紀》，「馬志強」一角令他重新彈起，「我雖然係其中一個主角，但擺位已經退後咗少少，始終知名度，有幾年冇咗。我同自己講，返得呢個屋企，做細都唔緊要，最緊要我清楚自己嘅路向，估唔到呢個角色將我嘅能力再提升，無論係知名度方面，公司入面啲人點樣睇我…郭晉安仲有一班好擁護佢嘅fans，同埋仲係一個有實力嘅演員；但係馬志強之後又好似冇乜嘢，直至《戇夫成龍》（2002年），呢個（丁常旺角色）真係好經典，監製要我增肥廿幾磅，剪個西瓜波嘅髮型，真係乜形象都冇晒！我心諗呢鋪得就得，唔得就以後都唔使諗，因為機會越嚟越少，條路越嚟越窄。於是我就去賭呢一鋪，拍咗3日外景，我同導演講『死喇，我唔敢做，我唔想拍，唔知點解』…全部人停晒喺度等我，我真係過唔到自己嗰關…我究竟做得啱定錯？導演話不如一齊睇番呢幾日拍過嘅嘢，睇完話『呢一刻嘅歡樂，就係畀你帶動住，你仲懷疑啲乜嘢呢』…」安仔亦憑傻傻更更的「阿旺」而大受歡迎，事業起飛，獲封視帝。撰文：黃曉妍郭晋安
【晴報】郭晉安憶為18點低收視離開TVB 「好似將我嘅演藝生涯劃上句號」
