[新劇造型]陳家樂同連詩雅婚禮可能要延期：一直夾唔到期！藝人陳家樂今日（17日）出席無綫新劇《異空感應》造型記者會，今次是他首擔男一之作，他稱相隔7年再跟監製王心慰合作，感到有點驚及緊張：「拍劇要廠景同外景咁輪更，當年拍《逆緣》我係二字頭仲頂得順，依家年紀大咗，冇以前咁Fit，今次再挑戰體能，諗起都滴汗，不過相信可以應付到。」他早前向女友連詩雅（Shiga）求婚成功，講到婚禮安排，他坦言原計劃明年中在港舉行婚禮及擺酒，現時不斷有變化，有可能延期：「我哋嘅工作已經排到出年3月，Shiga仲可能要去外地工作，一直都未夾到期傾婚禮細節，連擺酒用嘅枱布同花都要揀，但希望可以喺下年年中搞到。日子方面，佢搵人擇咗吉日，過大禮就交畀屋企人負責，最重要係結婚當日。（預計擺幾多圍？）未知，因為最近防疫政策又再放寬。（想老闆楊受成送咩禮物？）我唔敢問，希望佢⋯ 其實都唔需要，靠自己努力， 佢出席婚禮已經好榮幸。」至於兄弟團方面，他指前年結婚的岑珈其給了他很多意見，對方是做兄弟首選。陳曉華操拳做打女 傷頸又拉傷大腿呻辛苦陳曉華（Hera）在劇中飾演刑警，而且要穿越時空，演繹兩個時空的人，她說：「我第一次睇劇本，睇到個腦爆炸睇唔明，睇第二次都係唔明，第三次我要買本筆記簿寫低，終於睇得明。」她透露監製事前為她安排了十堂的武打訓練，鍛煉體能及打拳，自評表現還算合格：「我之前韌帶撕裂，好耐冇做運動，所以初時上堂整親條頸又拉傷大腿，令之後嘅訓練有啲辛苦。」而為貼合角色，她花了一個月時間壓低聲線說話，令自己感覺更硬朗。另外，劇中她跟陳家樂演情侶，問到2人有否親熱戲？她說：「暫時未睇到，不過劇本入面有啲好Sweet同好肉麻嘅對白，我睇到都覺得好尷尬。（你喺《美麗戰場》嘅對白都好肉麻？）《美麗戰場》係BB戀愛，今次係大人戀愛，兩種都要試吓， 拍完兩套劇就知道自己鍾意咩男人。」
[新劇造型]
