【明報即時】林敏驄籲保育廣東歌︰希望新一代畀機會我哋介紹嗰時咁好嘅嘢林敏驄希望年輕人可以給他們機會，讓他們有機會為大家介紹當年有過那麼好的廣東歌。（資料圖片 / 明報製圖）林敏驄日前接受無綫娛樂新聞台《Star Talk》訪問，宣傳下月舉行的《蘇格蘭場今天星閃閃林敏驄暨車總腦交戰時日如飛40週年成人禮作品展演唱會之Part 2更精彩》。演唱會名字愈來愈長，他笑言入行40年，每年一行字的話，演唱會名其實不算長。阿驄說︰「要承襲上一次演唱會個名係好長，Keep番個Style﹗本來個名仲長，80幾個字。上次個名本來Grand啲，但有人話不如整個名長啲，話我講嘢咁鬼長氣，結果出到嚟幾得意呀，變成Signature﹗」演唱會名當中包含了張國榮《無心睡眠》、梅艷芳《夢伴》及陳百強《深愛著你》這3位已故歌手的經典金曲，阿驄坦言︰「呢3首歌係我嘅最愛，尤其佢哋唔喺度，真係好多珍貴嘅回憶。」演唱會選址戶外舉行，阿驄希望帶出節日及派對氣氛。他感嘆廣東歌需要保育︰「我哋嗰代或者上咗年紀嘅，呢堆歌你一聽番就自然有無限感受。廣東歌好需要保育，嗰啲歌距離我哋時間愈嚟愈遠，好難避免會漸漸fade out，希望新一代畀機會我哋去介紹番嗰陣時曾經有過咁好嘅嘢，因為佢哋未必知道。」阿驄目前除揀選新生代歌手獻唱自己作品外，也在努力邀請原唱者現身。談到曾獻唱其作品《梵音》、《再會》及《午夜狂奔》的關淑怡，阿驄說︰「搵緊佢，完全唔知邊度搵佢，但佢失驚無神又會棟咗喺度。佢好適合唱《梵音》，因為佢個人比較煩，可以Carry到。」0 seconds of 0 seconds 談到填詞人的使命，阿驄認為是將歌曲優化︰「我哋寫詞係令隻歌錦上添花，嗰時好多英文歌或日本歌已經好好聽，落到我哋手上點樣可以令首歌更加好？更加感動到人？我一有時間就會重溫自己嘅作品，有啲原稿Keep咗好多年，次次搬屋都差啲掉咗，但又喺番度，得閒睇吓都好多回憶。」阿驄表示譚詠麟（阿倫）的《愛在深秋》是他當年最趕的作品︰「阿倫次次都要我唱一次畀佢聽，有時會唱Demo，好似《忘不了你》有啲音應該點樣『拉』過，驚佢有誤會，你知資質有限啦！」至於當年與曾志偉的二次創作歌曲，阿驄坦言跟對方一拍即合：「嗰時我開咗個錄音室，自己諗住有製作，咁搞咩好呢？跟住諗起自己讀書時成日改人歌詞，咁啱嗰時總經理又咁啱好紅，做埋導演咁，就走去撩佢，佢又肯喎。錄完咪搵EMI發行，結果嗰隻碟係佢哋當年全年最賣得嘅，一出就賣咗20萬隻（4白金）。」問到二次創作心得，阿驄笑言最重要抱住「整蠱」人心態：「即係整蠱個原創。」（即時娛樂）林敏驄
【明報即時】林敏驄籲保育廣東歌︰希望新一代畀機會我哋介紹嗰時咁好嘅嘢
