【晴報】谷婭溦茶記黑面鬧爆侍應態度差 被指唱衰香港：炒作挑起仇恨近日香港茶餐廳嘅服務態度成為網民熱話，歌手谷婭溦日前就食住呢個熱潮，拍片紀錄低自己去食香港茶餐廳。谷婭溦剪接佢嘅用餐片段，指茶餐廳服務差，呼籲內地人去食要做好心理準備。谷婭溦片段一出就被鬧「唱衰香港」，更懷疑佢惡意剪輯，意圖呃流量。谷婭溦不時向內地網民介紹香港特色美食，日前佢去到內地小紅書大熱嘅香港茶餐廳拍片，更以「做好被罵的準備再來吧」為題。影片一開頭，谷婭溦剪接咗一段一名身穿黑色衫嘅員工，喺佢身後大聲怒罵「搞佢老X臭X咩」約兩秒嘅片段，不過片中睇唔到該位員工怒罵嘅對象。片中谷婭溦推介咗幾款食物都讚好，但去到食芝士西多士嘅時就話自己唔鍾意食咁油嘅食物，覺得好難頂。谷婭溦全程用打光燈照住自己，而影片的中段有店員向Vivan詢問：「麻煩可唔可以熄咗佢啊(打光燈)」，谷婭溦隨即黑面，唔耐煩咁向攝影師表示「熄咗佢啦，熄咗佢」，又轉番用唔正嘅廣東話同店員講：「你好好同我講冇問題，但你哋夥計服務態度真係太差啦，佢鬧人，佢講粗口喎」，而店員隨即都同佢講唔好意思，不過之後唔知店員再講咗啲咩，畀谷婭溦消音。Vivan最後變面，笑番晒咁拍埋試食片，但心情明顯欠佳，出到餐廳勸籲如果去香港食茶餐廳要有心理準備：「請你們一定要保持好的心態，不然真的很容易發脾氣，因為可能香港的茶餐廳的文化關係，餐廳員工的態度真的不是那麼的好。」影片一出即引起大批網民批評佢唱衰香港：「呢種唯怕天下不亂的人渣，企圖騙不會粵語的大陸人，看完她的片，以為個侍應真係有幾無禮，甚至上升到歧視，然後就又可以炒作一番。」、「剪啲唔剪啲。」，「其實我覺得，甚至未必鬧緊佢..個男人似打緊電話多啲。」、「用這種誤導、以偏概全的內容挑撥引起流量。」又有人指佢本身行為都騷擾到其他客人：「其實這些大陸網紅未問過人，隨隨便便拍攝，連路人都被拍入鏡，然後就被放上網上，非常得人憎。相信無人希望自己吃飯的樣子被無緣無故放到網上吧。」不過都有人撐佢：「香港人是不是被人罵慣了？為甚麼吃個茶餐廳要咁勞氣。」，「香港人的服務素質是真的差。」圖片來源：抖音截圖
【晴報】谷婭溦茶記黑面鬧爆侍應態度差 被指唱衰香港：炒作挑起仇恨
