《2021香港小姐競選》日前已經完美落幕，最高收視是歌神張學友壓軸表演環節、錄得27.4點收視，有180萬名市民同時收看。不過當晚頒發「最上鏡小姐」時發生甩轆情況，無綫副總經理曾志偉更被拍得黑面向工作人員查問，又肅跟幾位司儀訓話。
曾志偉受訪時澄清沒有黑面，只是緊張，又指原來是有4位落選佳麗換錯衫趕不及出來。他續分享個人經驗，記得一次做港姐司儀宣布錯落選佳麗入圍：「咪齊齊入圍囉！唔會影響賽果嘅，唔使理台下工作人員嘅手勢、淡定啲，最緊要唔好自亂陣腳！」
志偉直言對港姐決賽好滿意，給予96分高分數，並點名大讚鄭裕玲及「新丁」丁子朗表現不俗，惟覺得陳凱琳有點壓力：「佢之前一個人做港姐真人騷主持做得好好，可能尋晚有鄭裕玲同台，唔好意思講太多。」
首次擔任港姐決賽主持的陳凱琳，表現亦被網民批評，事關她整晚經常翹手好礙眼，又一度說話食螺絲。不過第一次做大Show，緊張都好正常！
