破毒強人｜曹永廉入虎穴臥底被槍指 定欣狂跑救阿蕭歷槍林彈雨下星期就踏入結局周嘅《破毒強人》劇情愈見緊張白熱化，除咗安樂( Matthew Ho 何廣沛 飾) 嘅妹妹安好能否平安脫身成為焦點；另一方面葉Sir( Edwin Siu 蕭正楠 飾)、Jackie( 張曦雯 Kelly 飾)同楊Sir( 曹永廉 Raymond Cho 飾)為搜集足夠證據緝拿文華( 陳豪 飾)等人歸案，不斷喺文華面前內鬨扯貓尾，楊Sir為埋身攞料仲偽裝變節投靠章琳( Nancy Wu Ting Yan 飾)，過程驚險萬分。噚晚文華試探楊Sir一幕，佢先要求楊Sir交出佩槍，更二話不說槍指著楊Sir太陽穴，逼令對方承認係警方派出嘅卧底；楊Sir雖略帶羞怯仍堅決否認，經過幾輪拉鋸之後，文華始放下戒心達成合作共識，仲向楊Sir開出兩大條件。呢場全長兩分鐘嘅槍指太陽穴場面，鏡頭除不斷來回喺文華冷漠狠樣、章琳緊張表情同楊Sir嘅強裝鎮定之外，又穿插Jackie拉隊準備拯救楊Sir嘅鏡頭， 加上一眾演員嘅演繹，將緊張氣氛推向極緻。曹永廉扮演嘅楊Sir亦贏盡口碑，獲唔少觀眾大讚演得自然，噚晚佢為了逼上司周Sir( 陳嘉輝 飾)允許參與卧底行動，以辭職反要脅對方；仲向Jackie坦白當日其實係想維護而非出賣同袍，成功化解Jackie對自己嘅誤會，令觀眾大讚角色有情有義。TVB喺社交平台上載呢幕嘅花絮片段，緊張場面仲因為陳豪忘記對白，令現場氣氛一秒崩壞，曹永廉仲笑唔停，拍攝氣氛愉快之餘，仲證明演員入戲出戲都相當自如。而噚晚結尾，章琳意外得悉福田( 蔣志光 飾)欲派人刺殺葉Sir，於是拋低一切趕往醫院仲致電對方，可惜葉Sir未帶手機而無法聯絡。據知今晚播出一集，章琳最終雖趕及通知葉Sir身陷險境，可惜殺手亦已掩至索命，掃射間仲令院友紛紛逃命，玻璃四射下阿蕭拖住定欣四處逃竄保命。根據花絮片段，為配合玻璃爆破時機，阿蕭同定欣要敏捷遊走，絕對係身手同反應嘅考驗。其中一幕，阿蕭同定欣為逃避追殺，一度躲於雜物房，而殺手開槍射爆多個枕頭次「羽毛紛飛」；場口睇落雖然浪漫，不過阿蕭事後就大嘆代價唔少：「大家唔好以為一條條只係大羽 毛，裏面仲有好多小羽毛，我拍完都忍唔住打咗幾個乞嚏。」鏡頭所見，阿蕭同定欣無論頭髮、面上同耳仔都滿佈小羽毛，不過定欣唔止未感困擾，仲搞笑大跳「甩毛舞」，又以「舞動奇蹟」Style教阿蕭揈甩身上玻璃碎，非常搞笑。PS:精彩
破毒強人｜曹永廉入虎穴臥底被槍指 定欣狂跑救阿蕭歷槍林彈雨
