樂隊Dear Jane出道多年，人氣爆燈，日前順利完成紅館演唱會。主音黃天翱（Tim）老婆楊洛婷回想過去的高低起跌，感觸寫下長文。她上載在演唱會後台與老公深情咀嘴的相片，又分享Dear Jane眾成員開騷時的英姿。
楊洛婷自爆曾被舊公司要求整容，拒絕後即遭冷藏零收入，幸得Tim的安慰，承諾會照顧她。有心水清網民即想到楊洛婷選香港小姐出身，曾簽約成為無綫藝員，要求她整容的舊公司會否就是無綫？
楊洛婷留言：「曾經有一段時間，我被舊公司不斷無理咁迫我去整容，因為我唔肯妥協、唔肯就範，所以就被人無情咁『掟入雪櫃』，結果我冇工作冇收入。當時我老公就好型咁同我講，佢會用佢嘅所有能力去照顧我。的而且確，我老公絕對有履行佢對我嘅承諾，而幸運嘅係，我精彩嘅主持生涯亦隨即展開。呢個就係我哋愛情故事嘅開始。」
楊洛婷又透露昔日Dear Jane經歷低潮，每次開騷大家都很擔心門票滯銷，她更曾試過勸老公轉行面對現實，慶幸現在終於苦盡甘來：
「雖然我一直都好相信我老公，好相信Dear Jane，我甚至可能係佢哋最強大嘅粉絲。但抱歉嘅係，我都有試過喺佢哋低潮時勸過我老公面對現實🤭，甚至叫佢轉變一下佢嘅職業。宜家諗番，我好慶幸佢當時冇聽我講，我真係好佩服佢地對理想嘅堅持同毅力！」
