鄭中基日前拍片回顧自己過往的經典MV時，大爆當年被TVB要求改《無賴》的歌詞，令他耿耿於懷之外，更拒絕再亮相TVB！
由於《勁歌金曲》要求有自己版本的MV：「好多時我哋就統一咗佢，無謂拍三四次。」更大爆《無賴》被要求改歌詞：「有句歌詞TVB一定要我改咗先可以參加《勁歌金曲》，就係『曾話過要戒煙，但講了就算』，佢唔知點解唔畀我講戒煙，我就特登要入過錄音室錄過另外一句歌詞『要儲錢但講了就算』。」
十幾年後再提起此事，他仍有不滿：「總之呢個喺我嗰陣時開始嬲TVB，而我嬲TVB之餘，我嬲返自己公司，點樣可以一個Artist嘅歌，為咗一個電視台你走去改兩隻歌詞，淨係for佢？但嗰陣時就算啦，就錄咗佢因為公司問題啦，就要做嗰件事，但由嗰時開始之後我就唔妥TVB到而家，到而家咁多年嚟你哋未見過我喺TVB出現過！」
