搶眼過視后！波波「蠱惑南半球」惡鬥深溝游嘉欣

無綫今日（26日）於將軍澳電視城舉行《周年慶典節目巡禮2022》，全台小生花旦齊集，個個衣香鬢影，當中雖然一眾視后級精心打扮，林夏薇一字膊輕露線頭，再加唐詩詠吊帶小背心騷香肩，但都唔及一班上位小花咁博命，個個谷到盡鬥搶鏡，而講到最煞食，絕對非「後生女」莫屬，「宅男女神」游嘉欣以白色超低胸毛毛裙上陣，大玩「羽毛球」，胸前更開深V勁晒成吋長事業線，非常有睇頭。

而同游嘉欣匹敵嘅，就係同樣「後生女」出身、最近升呢「無綫性女」嘅黃婧靈（波波），出名身材出眾嘅佢，以鮮紅色晚裝Sharp爆亮相，不但勁Push 36E心型胸，最令人喜出望外嘅，就係下胸位置再開「鬼崇窿」，露出「蠱惑南半球」，心機程度比游嘉欣略勝一籌。至於「港姐幫」張寶兒及黃嘉雯，一樣大晒事業線，同樣吸睛。