破毒強人｜陳豪疑再被背叛馬明突出場？ 殺手關嘉敏現身嘗打女滋味十號颶風襲港下，TVB繼續為觀眾播出唔同節目消閒，橫風橫下下播出嘅一集《破毒強人》，除咗毒梟鄭福田( 蔣志光 飾)離奇身亡之外， Carman Kwan 關嘉敏 客串演出嘅女殺手亦成為焦點。以外賣員打扮現身嘅Carman全程木無表情，加上173cm嘅高䠷身形同凌厲眼神、飄逸長髮仲有兇狠嘅開槍姿勢，短短一場戲已令觀眾有極深印象，仲有唔少人留言大讚Carman夠高夠型，仲似乎天生「戰鬥格」。Carman就指今次終能一償心願成為打女、更扮演女殺手時相當興奮，事前仲專誠上堂接受打筋斗、出拳、踢腿同閃避等特訓，雖然最終派上用場嘅動作唔多，不過已令佢過足「打」癮同期待下一次機會喇。 身手靈活嘅Carman自細已非常好動，除咗習「舞」多年亦學過體操，最後二選一選擇跳舞：「學體操其實都學咗有兩、三年，考晒金、銀、銅 牌。」 長大後恨做打女嘅佢，又專誠學功夫、打筋斗同Tricking(武術特技)積極自我增值：「我最鍾意打筋斗，我覺得可以成個人凌空同飛起，如果你拍場戲，打打吓嚟個空翻係幾咁正，我係好想做到，但我只係學咗跟斗同 Tricking個零、兩個月，仲未見得人。另外我仲有跟冼灝英師傅學大聖劈掛，主力玩兵器多，好似長棍、雙刀同劍等。」自細已經「坐唔定」嘅佢話：「當初媽咪叫我學跳舞純粹係想畀我放電，玩玩吓自己鍾意咗。」Carman又分享練習Tricking同打筋斗情況，片段中嘅佢動作完成度不俗。 至於劇情發展至福田被殺，觀眾普遍覺得佢多年前出賣文華( 陳豪 飾)無情無義，認為佢死有餘辜，只係冇諗過橋段咁早出現，由於噚晚並未曝光殺「田」兇手，為結局篇佈下極大懸念，觀眾都紛紛猜測誰是真兇，又認為「結局篇預告」已俾出貼士。預告片段中，竟有全新人物同名字登場，馬國明同「張強」人同名都被提及，到底佢哋係咪同一人，同福田之死又有咩關係？而文華嘅病情同生死下星期亦會終極揭曉，佢嘅癌病不斷惡化，文華又會迎接點樣嘅結局呢？根據預告，文華除咗生命危在旦夕，似乎亦將再遭受被背叛嘅命運，到底背叛者會係邊個？係咪佢最重視嘅章琳( 胡定欣 飾)定係妹妹慘死嘅安樂( 何廣沛 飾)？記得下星期繼續緊貼《破毒強人》結局篇。《破毒強人》結局篇 星期一至五晚20:30 翡翠台破毒强人
破毒強人｜陳豪疑再被背叛馬明突出場？ 殺手關嘉敏現身嘗打女滋味
