《破毒強人》結局必睇丨 陳豪阿蕭終極生死戰打足11粒鐘 張曦雯拒信文華慘死收場TVB熱播劇《破毒強人》今晚8點半翡翠台播出最後一集，噚晚（7號）呢集洋蔥大放送，行徑日趨瘋狂嘅文華（陳豪飾）喺Jackie（張曦雯飾）車上裝炸彈， 葉浩天（蕭正楠飾）及 Jackie爸爸鄧Sir（張國強飾）帶隊前往營救，現場更有拆彈專家，飾演拆彈專家嘅文竣瑋更被網民大讚靚仔！為咗與Jackie同生共死，葉Sir主動登上「炸彈車」，不過Jackie明顯唔想連累阿天。噚晚呢幕十分洋蔥，為減低Jackie緊張感，阿天不斷氹Jackie開心，更許下愛的承諾：「天光之後想做啲咩」、「過咗今晚最重要係每一朝可以同你一齊食早餐」，Jackie甜笑回應：「好多年冇見過你笑，笑多次畀我睇。」另邊廂炸彈時間一直倒數，令二人甜蜜對話更覺淒酸。阿天為救 Jackie，致電文華求「拆彈答案」，文華最終叫剪斷藍色線。擾攘一輪後，Jackie使計令阿天落車獨自面對生死，決定唔聽文華勸告剪斷紅色線，結果當場被炸死。對於文華放完炸彈又講真話，網民大感難以置信，又力指文華攻心計；而噚晚張曦雯整場戲表現相當亮麗，含淚對住爸爸鄧Sir強顏歡笑，場口令人動容，當佢下定決心博一舖剪紅線嗰陣，完全感受到角色嘅絕望及驚恐， 成功吸獲正評；至於蕭正楠則被指上車陪Madam 嗰刻又型又Man。其實呢場爆破戲並唔簡單，為拍出汽車被炸至空中翻騰兩周半，劇組出動大型吊車協助拍攝，而且一take過不容有失。至於今晚大結局，備受關注就係文華與阿天嘅雨中終極生死戰！呢場戲長達約三分半鐘嘅正邪大戰，不但拍得甚有戲味，兩位男主角為求逼真更出盡全力。官方花絮片記錄正邪大戰重頭戲拍攝花絮，陳豪與蕭正楠埋位前有講有笑，不過一正式試戲二人已極速角色「上身」；雖然試戲憬以慢動作模式進行， 但兩位均相當認真，出盡全力一度打至嘭嘭聲，又齊齊化身空中飛人凌空被拋落地。阿蕭受訪時透露結局打戲由晚上7點打至翌日早上6點，雖然拍攝係六月天氣開始暖，由於被水車噴足成晚，阿蕭坦言凌晨後開始見凍：「我記得嗰晚我哋打到忘形時，有同事知我哋凍走去買咗杯好暖嘅奶茶，我覺得杯嘢好溫暖。」阿蕭坦言為配合劇中角色「極致憤怒」狀態，有臨場要求加對打動作：「要打就打到盡，唔好咁錫身，所以一嚟嗰個飛踢好靚，阿Mo反應做得好，我自己又盡力去踢，所以出嚟效果好睇。（咁投入有冇受傷？）返到屋企係有損少少，但唔嚴重。今次拍動作戲最難忘喺成個打鬥都係喺水中進行，我覺得係男人嘅浪漫。」《破毒強人》今晚八點半翡翠台播大結局破毒强人
《破毒強人》結局必睇丨 陳豪阿蕭終極生死戰打足11粒鐘 張曦雯拒信文華慘死收場
