劉穎鏇着超貼小背心打到跪地 2021版羅拉 唐詩詠睇好快上位
曾志偉總經理接管TVB其中一個任務，就要將電視台年青化，因此，新生代藝人最有優勢。24歲劉穎鏇（Tiffany）擁有34.5D、25、35完美Body，最重要唔止睇得，仲非常打得。日前她跟唐詩詠為TVB新劇《隱形戰隊》拍外景，兩人要合力制服女疑犯，着住露臍小背心加貼身長褲的Tiffany身手敏捷，連詩詠都激讚：「以後着泳衣、動作鏡頭交晒畀佢啦！」
文偉鴻監製嘅新劇《隱形戰隊》令劉穎鏇有好大發揮機會，當日Tiffany跟軍裝Madam唐詩詠開早班喺尖沙咀鬧市拍外景，劇情講兩人夾手夾腳用武力制服一名精神有問題嘅持刀女疑犯。有胸有腰又有腳嘅Tiffany大騷真人版芭比身形，完全唔使P圖，25吋腰加44吋長腿，貨真價實，加埋腹肌及手臂線條，行出嚟唔打得都相當睇得。
拍動作戲勁度十足
當日Tiffany要勇救跟女疑犯打到瞓咗落地嘅唐詩詠，拍該場動作戲有啲難度，武指要Tiffany衝前，再單膝跪地跣住去女疑犯身邊，然後箍實她糾纏，再出力將她掟走。埋位前Tiffany先拉筋，戴上護膝及試位，見她霸氣地大叫一聲後，就咬緊牙關衝住跣過去，勁度十足，可惜唔啱位，又箍得唔夠實，甚至因為眨咗眼要重新來過，NG 30多次，拍到唐詩詠要拎返把遮唔好曬親，期間監製不停鼓勵她：「幾好㗎嘞！做個100分嘅！」拍到全身出晒汗嘅Tiffany坐喺地下垂頭喪氣，拍到有啲亂，要飲啖水定吓驚及搓吓膝頭，文偉鴻見狀，知佢已盡晒全力滿意收貨。相對地，唐詩詠嘅動作鏡頭簡單得多，惟一畀兩名特技演員托住踢腿，Tiffany從旁打氣說：「You can do it.」
寧做打女唔行性感
Tiffany拍呢套劇要着泳裝又要打，佢承認拍動作戲有壓力，至於性感係劇情所需，唐詩詠大笑說：「以後着泳裝及動作戲交晒畀佢，自從佢做咗Gym變得好firm，係健康性感，同選美時好唔同。」Tiffany就話寧願做打女都唔做性感女神，唐詩詠就睇好Tiffany會愈做愈好更會上到位：「繼惠英紅後TVB好耐冇一位動作女演員，嚟緊TVB所有動作戲直頭要搵佢，講真好少女演員咁快拍到打戲，以後我拍揸槍戲做『槍神』，擺吓pose就得喇！(唔怕畀佢搶晒鏡頭咩？)梗要畀佢啦！𠵱家我拍唔到動作戲啦。」
